Toshkent shahrida noqonuniy o‘rnatilgan tashqi reklama va axborot obyektlari (konstruksiyalari) majburiy tartibda demontaj qilinadi. Poytaxt hokimining bu boradagi tegishli qarori qabul qilindi.
Qarorda qayd etilishicha, 2024-yilning 1-iyuniga qadar bunday obyektlarni qonuniylashtirish imkoniyati berilgan.
Demontaj ishlari hokimlikning Raqamli rivojlanish departamenti hisobidan amalga oshiriladi. Milliy gvardiya demontaj vaqti jamoat xavfsizligini taʼminlaydi.
Poytaxtda noqonuniy o‘rnatilgan tashqi reklama va axborot obyektlarini demontaj qilish ishlari 2024-yil 31-dekabrga qadar yakunlanadi. “Toshkent shahar elektr tarmoqlari” MCHJ demontaj qilinishi kerak bo‘lgan tashqi reklama va axborot obyektlarini majburiy tartibda elektr tarmog‘idan uzish choralarini ko‘radi.
Eslatib o‘tamiz, Toshkent shahrida reklama konstruksiyalarini ommaviy buzib tashlash ishlari 2021-yil 8-apreldan boshlagan edi. Tashqi reklama obyektlarining egalari konstruksiyalar qonun bo‘yicha o‘rnatilgani, “snos” bo‘yicha ko‘rsatma “yuqoridan” bo‘lganini ma’lum qilgan. O‘shanda tadbirkorlar hukumatning harakatini noqonuniy deb aytgan, chunki bannerlar sud qarorisiz buzib tashlangan.
Reklama sohasidagi tadbirkorlar hatto ushbu vaziyatni hal etishga chaqiruvchi bir nechta reklama bannerlari o‘rnatish orqali reklama konstruksiyalarining noqonuniy buzilishini to‘xtatishni so‘rab prezident Shavkat Mirziyoyevga murojaat yo‘llagan. Monopoliyaga qarshi kurashish qo‘mitasi poytaxtdagi reklama konstruksiyalarning yarmi talabga javob bermasligini bildirib, tomonlarni qonunchilikka rioya qilishga chaqirgandi.
Izoh (0)