Singapur qirg‘oqlari yaqinida 19-iyul kuni ikki yirik neft tankeri to‘qnashib, yonib ketgan. Bu haqda Reuters nashri xabar berdi.
Manbada aytilishicha, Singapur bayrog‘i ostidagi Hafnia Nile tankeri va San-Tome va Prinsipi kompaniyalariga qarashli Ceres I neft tashuvchisi Singapurning Pedra Branka orolidan taxminan 55 kilometr shimoli-sharqda to‘qnashib ketgan. Tor bo‘g‘ozda kemalar harakati faollashib ketgani, tezlik va tuman inobatga olinmagani oqibatida halokat kelib chiqqan.
Halokatning Singapur yonilg‘i quyish porti yaqinida ro‘y berishi mintaqa bo‘yicha xavotirlarni kuchaytirgan. Chunki bo‘g‘ozga neft to‘kilishi xalqaro suv yo‘li yopilishiga olib kelishi mumkin.
To‘qnashuv oqibatida 2 nafar dengizchi jiddiy darajada jarohatlangan va kasalxonaga olib ketilgan. Qolgan ekipaj aʼzolari esa tezda qutqarilib, xavfsiz hududga yetkazilgan.
To‘qnashuv yuz bergan paytda Hafnia Nile kemasi bortida 22 kishi va Ceres I kemasida 40 nafar ekipaj aʼzosi bo‘lgan. Ikki tanker 19-iyul kuni tonggi 6:15 da to‘qnashib ketgan. Voqeadan ko‘p o‘tmay hududda patrullik qilayotgan Singapur va Indoneziya patrul kemalari halokat signali tarqatgan.
Singapur harbiy-dengiz kuchlari tomonidan eʼlon qilingan fotosuratlarda bitta tankerdan quyuq qora tutun chiqayotgani, kema ekipaji qutqarilib, kasalxonaga olib ketilgani aks etgan. Qo‘shni Malayziyaning atrof-muhitni muhofaza qilish idoralari neft okeanga to‘kilishi holatlarida keyingi chora-tadbirlarga tayyorgarlik haqida ogohlantirish eʼlon qilgan.
Maʼlumotlarga ko‘ra, Panamax kompaniyasi tomonidan ishlab chiqarilgan Hafnia Nile tankeri taxminan 300 000 barrel neftni olib ketayotgan bo‘lgan. Ceres I kemasida olib ketilayotgan yonilg‘i hajmi esa hozircha aniqlanmagan.
AQSHdagi Lloydʼs List razvedka boshqarmasi bosh tahlilchisi Mishel Bukman halokatga uchragan kemalar Eron neftini tranzit qilishda foydalanilganini maʼlum qilgan. So‘nggi bir oyda Ceres I kemasi Singapur bo‘g‘ozida kamida 3 marta tranzit amalga oshirgan.
Ceres I bir necha bor AQSH sanksiyalarini buzgan holda Eron neftini tashish yoki jo‘natishda ishtirok etib kelgan, degan Mishel Bukman.
Bir qator rasmiylar kemalar halokati uyushtirilganini taxmin qilgan. Biroq buni isbotlovchi dalillar topilmagan. Tankerlarni boshqaruvchi muassasa ham OAV so‘rovlariga javob bermagan.
Izoh (0)