Samarqand va Farg‘ona viloyatlarida kredit mablag‘larini o‘zlashtirish holatlari aniqlandi, deb xabar bermoqda Prokuratura departamenti.
Unga ko‘ra, Bosh prokuratura huzuridagi departamentning Urgut tuman bo‘limi tomonidan tergovga qadar tekshiruv o‘tkazilgan. “B.B.” fermer xo‘jaligi rahbari B.B. mustaqil baholovchi “E.B.” MCHJ mas’ul shaxslari va boshqalar bilan o‘zaro til biriktirib, hududiy tijorat banki filiali bilan tomchilatib sug‘orish uskunalarini sotib olish uchun kredit shartnomasi tuzib, kredit ta’minoti sifatida taqdim etilgan mulklarning bozor qiymatini sun’iy oshirib ko‘rsatgan va 450 mln so‘m kredit mablag‘ini qo‘lga kiritgan.
Shu kabi, departamentning Farg‘ona viloyat boshqarmasi tomonidan o‘tkazilgan tergovga qadar tekshiruvda fuqaro SH.S. 2 dona Equinox xarid qilish uchun hududiy tijorat banki filialidan ota-onasining nomiga 660,7 mln so‘mlik kredit shartnomalari rasmiylashtirishga erishib, avtomashinalarni kredit ta’minoti sifatida garovga qo‘ymasdan boshqa shaxslarga 67 000 AQSH dollariga sotib yuborgani aniqlangan.
Mazkur holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari o‘tkazilmoqda.
Izoh (0)