Qirg‘izistonga O‘zbekiston hududidan noqonuniy atirgul olib o‘tilishiga chek qo‘yildi. Bu haqda AKI Press nashri xabar berdi.
Manbada aytilishicha, voqea haqida O‘sh bojxona xizmati xabar bergan. O‘sh shahriga kirish bojxona punktida 3000 donadan ortiq atirgul olib o‘tishga uringan shaxs to‘xtatib qolingani xabar qilingan.
Davlat bojxona xizmati ushbu xabarni tasdiqlab, holat qo‘shimcha ravishda o‘rganilayotganini bildirgan. Noqonuniy tovarlarni olib o‘tishga uringan fuqaroni shaxsi aniqlashtirilib, hujjatlari tekshirilgan.
Chegarada to‘xtatilgan shaxs Qirg‘iziston fuqarosi bo‘lgan. U 11-iyul kuni o‘zining Mercedes-Benz Sprinter 211 rusumli avtomobilida noqonuniy tovar olib o‘tishga uringan.
Avtomashina ichi tekshirilganda topilgan gullarning umumiy soni 3240 dona bo‘lgan. Haydovchi gullarni Namangan viloyati hududidan olib kelganini aytgan.
Gullar hech qanday tasdiqlovchi va bojxona hujjatlarisiz tashilgan. Musodara qilingan gullarning o‘rtacha bozor narxi 156 600 qirg‘iz so‘mi (o‘zbek valyutasida qariyb 23 mln so‘m)ni tashkil etgan.
Izoh (0)