Isroil armiyasi har qanday vaqtda “Hizbulloh” qurolli kuchlarining kuchayishiga javoban Livanga kutilmagan va keskin zarba berishga tayyor.
The Times of Israel nashri xabar berishicha, bu haqda Isroil mudofaa vaziri Yoav Galant mamlakat shimolidagi harbiy qismlardan biriga safari chog‘ida aytib o‘tgan.
“Biz shimoliy mintaqada cheklangan jangovar operatsiyalarni olib bormoqdamiz. Bunga Isroil mudofaa kuchlarining kichik qismi jalb qilingan, biroq hamma narsa bir zumda o‘zgarishi mumkin. Janubdagi asosiy harakatlar shimolga ko‘chishi mumkin. Bu tez, kutilmagan va o‘ta keskin bo‘ladi”, dedi vazir.
Shu bilan birga, u Isroil hamon vaziyatni “Hizbulloh” bilan kelishuvlar orqali hal qilishga tayyor ekanini yana bir bor ta’kidladi.
Bu mintaqaning janubda sodir bo‘layotgan voqealarga aloqasi yo‘q, agar “Hizbulloh” biz bilan kelishuvga erishmoqchi bo‘lsa, chegara chizig‘idan uzoqlashib, Litani daryosining narigi tomonidagi hududlarga ko‘chib o‘tishi kerak bo‘ladi, dedi u.
18-iyun kuni Isroil armiyasi Livandagi hujum harakatlarining tezkor rejalarini tasdiqlagan edi. G‘azo sektorida Falastinning HAMAS harakatiga qarshi operatsiyadan so‘ng Isroil hukumati vaqti-vaqti bilan Livan janubidan davlat hududini o‘qqa tutayotgan “Hizbulloh” kuchlariga zarba berishi kutilmoqda.
Izoh (0)