Toshkentda qo‘pol qoidabuzarlik sodir etgan avtobus haydovchilari qora ro‘yxatga kiritiladi

Toshkent shahrida qo‘pol qoidabuzarlik sodir etgan avtobus haydovchilari qora ro‘yxatga kiritiladi. Bu haqda “Toshshahartransxizmat” xabar berdi.

Ijtimoiy tarmoqlarda Toshkent shahrida harakatlanuvchi 67- va 18-sonli avtobuslarning yo‘l harakati qoidalarini qo‘pol ravishda buzgani aks etgan video keng muhokamalarga sabab bo‘ldi. Ushbu holat masʼul xodimlar ishtirokida tanqidiy muhokama qilinib, yo‘lovchilar hayotini xavf ostiga qo‘ygani, o‘z xizmat vazifasini suisteʼmol qilib qo‘pol qoidabuzarlikni amalga oshirgani uchun ushbu haydovchilar bilan tuzilgan mehnat shartnomasi bekor qilingan.

Qayd etilishicha, qo‘pol qoidabuzarlik sodir etgani uchun mehnat shartnomasi bekor qilingan haydovchilarning elektron bazasi, yaʼni qora ro‘yxati joriy etilgan bo‘lib, unga ko‘ra ushbu haydovchilar avtobus saroyi filiallariga qayta ishga olinmasligi qatʼiy belgilangan. Hozirda ushbu ro‘yxatga kiritilgan haydovchilar soni 197 nafarni tashkil etmoqda. 18-sonli avtobus haydovchisi ham sodir etgan qoidabuzarligi uchun ushbu ro‘yxatga kiritilgan.

“Toshshahartransxizmat” taqdim etgan ma’lumotga ko‘ra, 2024-yilning o‘tgan 2 choragida jami 1392 ta qoidabuzarlik aniqlangan. Ularning 955 tasi uyali aloqa vositasidan foydalanish bilan bog‘liq.