Navoiy viloyati Nurota tumanida marmarni noqonuniy qazib olgan MCHJ aniqlandi, deb xabar beradi Bosh prokuratura huzuridagi departament.
Qayd etilishicha, departamentning Nurota tuman bo‘limi tomonidan tergovga qadar tekshiruv o‘tkazilgan. Tekshiruv davomida “E.” MCHJ masʼul shaxslari tegishli ruxsatnoma olmasdan tumandagi “Suvliq” granit koni hududidan 404,73 metr kub hajmdagi marmarni noqonuniy ravishda qazib olib, davlat va jamiyat manfaatlariga 209,1 million so‘m zarar yetkazgani aniqlangan.
Mazkur holat yuzasidan Jinoyat kodeksining 229-moddasi (o‘zboshimchalik) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Samarqandda marmarni noqonuniy qazib olganlar davlatga 5 mlrd so‘mdan ziyod zarar yetkazgani to‘g‘risida xabar berilgandi. Iyun oxirlarida ham Navoiyda marmar va ohaktoshlarni noqonuniy qazib olish holatlari ma’lum bo‘lgan edi.
Izoh (0)