Shavkat Mirziyoyev yangidan ochilgan Qo‘qon aeroportini borib ko‘rdi (foto)

Shavkat Mirziyoyev aholi hayoti, hududlar rivoji bilan yaqindan tanishish maqsadida Farg‘ona viloyatiga keldi.

Prezident matbuot xizmatining xabar qilishicha, davlat rahbari tashrifni Qo‘qon aeroporti bilan tanishishdan boshladi. 2024-yil mart oyida ushbu aeroport yangidan ochilgan edi. 11-iyul kuni O‘zbekiston prezidenti samolyoti ilk bor bu yerga qo‘ndi.

Mazkur aeroport 1977-yilda qurilgan bo‘lib, yaqin yo‘nalishlarga parvozlar amalga oshirilgan. Keyinchalik faqat harbiy havo kuchlari tomonidan foydalanilgan. Modernizatsiya natijasida ushbu aeroport orqali yana fuqaro aviatsiyasi parvozlari yo‘lga qo‘yildi.

Davlat rahbari bu yerdagi bunyodkorlik ishlari bilan tanishdi.

Aeroportda 100 nafar yo‘lovchiga mo‘ljallangan yangi terminal qurilgan, uchish-qo‘nish yo‘lagi qoplamasi ta’mirlangan. Zamonaviy aeronavigatsiya uskunalari o‘rnatilgan. Bu ishlar natijasida aeroport A 320-200 va ATR 72-600 rusumli samolyotlarni qabul qilish imkoniyatiga ega bo‘ldi.

Prezident endi bu aeroport xalqqa manfaat keltirishi kerakligini ta’kidladi. Buning uchun narx va xizmatlarni odamlarga qulay qilib, parvozlarni ko‘paytirish bo‘yicha ko‘rsatmalar berildi.

Ichki turizm imkoniyatlaridan foydalanish yaxshi samara berishi, xalqaro reyslarni ham yo‘lga qo‘yish mumkinligi qayd etildi.

Prezident hududlar rivoji bilan tanishish maqsadida Farg‘ona viloyatida so‘nggi marta 2023-yil 27—28-iyul kunlari bo‘lgandi. Safar davomida qishloq xo‘jaligi va sanoatda ishga tushirilgan yangi ishlab chiqarish quvvatlari hamda mahallalar hayoti bilan tanishdi.

Shuningdek, hududlarning iqtisodiy o‘sishini ta’minlash va aholi farovonligini oshirish uchun joylardagi mavjud salohiyatni ishga solish masalalari yuzasidan videoselektor yig‘ilishi o‘tkazdi.