Toshkentda besh kishi bir bolani “samosud” qilib, mashinaga ortib ketgani yuzasidan izoh berildi

Ijtimoiy tarmoqlarda Gentraʼdan 5 kishi tushib bir bolani dahshatli tarzda kaltaklagani va mashinaga ortib ketgani haqida videolar tarqaldi. IIBB holat yuzasidan maʼlumot berdi. 

Unga ko‘ra, holat 1-iyul kuni taxminan soat 20:25 larda Yunusobod tumani, Iftixor ko‘chasida sodir bo‘lgan. Fuqarolar 1988-yilda tug‘ilgan N.T., 1993-yilda tug‘ilgan S.Q., 1987-yilda tug‘ilgan D.Q., 1995-yilda tug‘ilgan H.Q., 1994-yilda tug‘ilgan J.I., 1997-yilda tug‘ilgan Sh.O.lar qarz masalasida og‘zaki janjallashgan. 

Fuqarolar S.Q., D.Q., H.Q.lar jamoat tartibini buzgan holda jamiyatda yurish-turish qoidalarini qasddan mensimay, N.T.ni urib tan jarohati yetkazgan. So‘ng N.T.ni kelgan avtomashinada uyi oldiga olib borgan. Unga shifoxonada birlamchi tibbiy yordam ko‘rsatilganidan so‘ng uyiga ketgan.

Mazkur holat yuzasidan Yunusobod tumani IIO FMB huzuridagi Tergov bo‘limi tomonidan Jinoyat kodeksining 277-moddasi (“bezorilik”) bilan jinoyat ishi qo‘zg‘atilgan. Gumon qilinuvchilar protsessual tartibda ushlangan. Tergov davom etmoqda.