Londonning “Chelsi” klubi “Atletiko”ning 20 yoshli hujumchisi Samuel Omorodio transferi bo‘yicha uchta taklif yubordi. Bu haqda jurnalist va insayder Matteo Moretto xabar bermoqda.
Manbaga ko‘ra, London klubi ispaniyalik hujumchini transfer qilish uchun Madridning “Atletiko”siga uch bora murojaat qilgan. “Aristokratlar”ning so‘nggi taklifi 50 million yevroga yetgan, biroq ispan klubi futbolchini sotishdan bosh tortdi.
Ma’lumotlarga ko‘ra, Madridning “Atletiko” klubi Omorodionni keyingi mavsumda saqlab qilish niyatida. Avvalroq OAVda Ispaniya klubi yozda futbolchi uchun 80 million yevro taklif qilinsa, transferga rozi bo‘lishi haqida xabarlar tarqalgan edi.
Hujumchi “Granada” tarbiyalanuvchisi hisoblanadi. La Liganing birinchi turida “Atletiko” darvozasiga gol urgach, futbolchi Madrid klubiga o‘tdi va “Alaves” klubiga ijaraga berildi.
Umumiy olganda, o‘tgan mavsumda ispaniyalik futbolchi barcha turnirlarni qo‘shib hisoblaganda 36 ta o‘yinda maydonga tushib, 9 ta gol urdi va bitta golli uzatmani amalga oshirdi. Transfermarkt internet portaliga ko‘ra futbolchining taxminiy narxi 35 million yevroni tashkil qiladi.
Izoh (0)