Futbol bo‘yicha Yevropa Chempionatining D guruhining 1-turida Fransiya Avstriyaga qarshi bahs olib bordi.
Uchrashuvda fransuzlar minimal hisobda (1:0) g‘alaba qozondi. Ikkinchi bo‘limning oxirgi daqiqalarida Mbappe himoyachi bilan to‘qnashib ketdi. Shifokorlar yordamidan so‘ng futbolchi maydonni tark etdi.
L’Equipe nashrining yozishicha, Fransiya terma jamoasi sardorining burni singan. O‘yindan so‘ng u tez yordam mashinasida Dyusseldorfdagi kasalxonaga olib ketilgan. Dastlabki tekshiruvlardan so‘ng futbolchining burni jarrohlik amaliyotiga muhtoj ekanligi xabar berildi.
Fransiya terma jamoasi hujumchisi Olivye Jiru hujumchi Kilian Mbappening jarohati haqida fikr bildirdi.
“Umid qilamizki, u tezda tuzalib ketadi. Bilaman, hozir unga juda og‘ir. Bu men bilan ham sodir bo‘lgan”.
Birozdan so‘ng Mbappe jarrohlik amaliyotiga muhtoj emasligi xabar berildi. Bu haqda Fransiya futbol federatsiyasi ma’lum qildi.
“Mbappe hozir davolanmoqda, biroq u yaqin orada jarrohlik amaliyotini o‘tkazmaydi. Davolanish so‘ngida futbolchi maydonga qaytishi uchun unga himoya niqobi tayyorlanadi”.
Kilian Mbappe X (sobiq Twitter) ijtimoiy tarmog‘ida “Niqob uchun variantlar bormi?”, deb yozib qoldirdi.
Rossiyalik futbolchi Andrey Arshavin Match TV kanalidagi ko‘rsatuvda Mbappega “Ninzya toshbaqalar” multfilmidagi Donatello obrazining niqobini taklif qilgan.
O‘zbekiston futbol assotsiatsiyasi Tibbiy qo‘mita raisi, shifokor Abror Pirriyev fransiyalik futbolchining jarohati haqida o‘z fikrlarini bildirdi.
“Futbolchining burni singanda jarohatning og‘ir-yengillik darajasiga qarab reabilitatsiya jarayoni o‘rtacha 1-3 oy vaqtni oladi. Og‘ir hollarda 6 oygacha cho‘zilishi mumkin. Chunki gap faqat burun suyagining sinishi yoki uning bitishi haqida emas, balki holat ortidan bosh miyaga yetkazilgan jarohat darajasi va uni to‘liq tuzalish davri ham inobatga olinishidadir.
Kilianga to‘xtalsak, hozirgi maʼlumotlarga tayanib aytish mumkinki, agarda Mbappe operatsiya stoliga yotadigan bo‘lsa, u uchun Yevropa chempionati tugaydi va muxlislar suyuklisini o‘rtacha 2 oydan keyin maydonda ko‘rishlari mumkin bo‘ladi. Ammo operatsiya talab qilinmasa ham Kilian uchun Yevropa chempionati so‘roq ostida qolaveradi. Muxlislarga taskin sifatida eng yaxshi taxminlarga tayansak, futbolchi finalga yaqin o‘yinlardagina (agarda jamoasi yetib borsa) yangi imijda – himoya niqobida maydonga tushishi mumkin bo‘ladi”, — deydi “Lokomotiv” BFK bosh shifokori.
Fransiya terma jamoasi Yevro—2024 musobaqasi doirasidagi ikkinchi uchrashuvni Niderlandiyaga qarshi o‘tkazadi. Uchrashuv 22-iyun kuni bo‘lib o‘tadi.
Izoh (0)