Hindistonning G‘arbiy Bengaliya shtatida yo‘lovchi va yuk poyezdi to‘qnashdi. Oqibatda kamida 15 kishi halok bo‘ldi. Bu haqda rasmiylarga tayanib, The Hindu xabar berdi.
Hodisa 17-iyun kuni mahalliy vaqt bilan ertalab soat 09:00 atrofida sodir bo‘lgan. Yo’lovchi poyezdi Rangapani stansiyasi yaqinida yuk poyezdiga borib urilgan. Dastlab beshta o‘lim holati qayd etilgan, keyinchalik ularning soni ortgan. Hodisa oqibatida 60 kishi jarohatlangan.
Hindiston temiryo‘l vaziri Ashvini Vayshnav o‘lganlarning qarindoshlari va jarohatlanganlarga to‘lovlar berilishini e’lon qildi. Bosh vazir Narendra Modi fojia qurbonlarining yaqinlariga hamdardlik bildirdi.
Hindiston dunyodagi eng yirik temiryo‘l tarmoqlaridan biriga ega va o‘tgan yillar davomida bir necha falokatlarni boshidan kechirgan. Ulardan eng dahshatlisi 1981-yilda Bixar shtatida yuz bergan. O‘shanda ko‘prikdan o‘tayotgan poyezd relsdan chiqib ketib, 800 nafarga yaqin odam halok bo‘lgan.
Izoh (0)