Samarqand hamda Buxoro viloyatlarida qalbaki alkogol va aksiz markasiz tamaki mahsulotlarini muomalaga kiritilishining oldi olindi. Bu haqda Bosh prokuratura huzuridagi departament xabar berdi.
Qayd etilishicha, departamentning Samarqand shahri bo‘limi tomonidan tezkor tadbir o‘tkazilgan. Tadbirda “D.I.” MCHJ savdo do‘konida 3 turdagi 2158 dona isteʼmolga yaroqsiz alkogol mahsulotlari sotuvga qo‘yilganligi aniqlanib, ushbu mahsulotlar ashyoviy dalil sifatida olingan.
Shu kabi, departamentning Buxoro tuman bo‘limi tomonidan o‘tkazilgan tezkor tadbirda Jondor tumanidagi YATT J.Q. savdo do‘konida 17 turdagi 241 dona qalbaki aksiz markali alkogol va 124 quti aksiz markasiz tamaki mahsulotlari sotuvga qo‘yilgani aniqlanib, ushbu mahsulotlar ashyoviy dalil sifatida olingan.
Mazkur holatlar yuzasidan Jinoyat kodeksning 176-moddasi (qalbaki pul, aksiz markasi yoki qimmatli qog‘ozlar yasash, ularni o‘tkazish) va 186-1-moddasi (etil spirti, alkogolli mahsulot va tamaki mahsulotini qonunga xilof ravishda ishlab chiqarish yoki muomalaga kiritish) bilan jinoyat ishlari qo‘zg‘atilib, tergov harakatlari o‘tkazilmoqda.
Avvalroq Qoraqalpog‘iston Respublikasi va Farg‘ona viloyatida qalbaki aksiz markali alkogol mahsulotlarini muomalaga kiritilishining oldi olingani to‘g‘risida xabar berilgandi.
Izoh (0)