Xorazm, Buxoro, Samarqand va Andijon viloyatlarida tabiiy resurs tarmoqlariga noqonuniy ulanish holatlari fosh etildi. Bu haqda Bosh prokuratura huzuridagi departament xabar berdi.
Qayd etilishicha, departamentning Qorako‘l tuman bo‘limi tomonidan “Buxoro suv taʼminot” AJ xodimlari bilan hamkorlikda tergovga qadar tekshiruvlar o‘tkazilgan. Tekshiruvda tumandagi “D.G.” MCHJga qarashli savdo kompleksi hamda “E.b.” NTM masʼul shaxslari o‘zboshimchalik bilan ichimlik suvi tarmog‘iga ulanib, jami 1,2 milliard so‘mlik ichimlik suvidan noqonuniy foydalangani aniqlangan.
Shu kabi, departamentning Jomboy tuman bo‘limi tomonidan o‘tkazilgan tergovga qadar tekshiruvda “Y.b.” fermer xo‘jaligi masʼul shaxslari 2 dona suv nasosini elektr tarmog‘iga to‘g‘ridan to‘g‘ri ulab, jami 229,4 million so‘mlik elektr energiyasidan noqonuniy foydalangani ma’lum bo‘lgan.
Departamentning Andijon shahri bo‘limi tomonidan o‘tkazilgan tergovga qadar tekshiruvda fuqaro U.D. “Shodlik” MFY hududidagi go‘sht do‘konini tijorat maqsadida elektr tarmog‘iga o‘zboshimchalik bilan to‘g‘ridan to‘g‘ri ulab, 118 million so‘mlik elektr energiyasidan noqonuniy foydalangani aniqlangan.
Xonqa tuman bo‘limi tomonidan o‘tkazilgan tergovga qadar tekshiruvda “T.H.” MCHJ rahbari T.I. tijorat maqsadida umumiy foydalanishdagi elektr tarmog‘iga o‘zboshimchalik bilan ulanib, 114,2 million so‘mlik elektr energiyasidan noqonuniy foydalangani aniqlangan.
Mazkur holatlar yuzasidan Jinoyat kodeksining 169-moddasi (o‘g‘rilik) bilan jinoyat ishlari qo‘zg‘atilib, tergov harakatlari o‘tkazilmoqda.
Avvalroq Andijon viloyatida energiya resurslaridan noqonuniy foydalanish holatlari fosh etilgani to‘g‘risida xabar berilgandi.
Izoh (0)