“Manchester Siti” bosh murabbiyi Pep Gvardiola Angliya Premyer Ligasining 38-turi doirasidagi “Vest Hem Yunayted”ga (3:1) qarshi o‘yindan keyin o‘tkazilgan matbuot anjumanida nemis mutaxassisi Yurgen Kloppning “Liverpul”ni tark etishi haqidagi savolga javob berish paytida ehtiroslarini yashira olmadi.
“Men uni juda sog‘inaman... Yurgen Klopp hayotimning haqiqatan ham muhim qismi edi. U meni murabbiy sifatida yangi bosqichga olib chiqdi. Biz bir-birimizni hurmat qilamiz.
Uning qaytib kelishini his qilyapman. Uning so‘zlari uchun katta rahmat. Men bunga yolg‘iz erisha olmasdim, klub rahbariyati meni doim qo‘llab-quvvatlaydi”, — dedi Gvardiola o‘yindan keyingi matbuot anjumanida.
Eslatib o‘tamiz, avvalroq Arne Slot Yurgen Klopp o‘rnini egallashi ma’lum bo‘lgan va “Liverpul” bilan 2027 yilgacha mo‘ljallangan shartnoma imzolagan. Xabar qilinishicha, ingliz klubi “Feyenoord”ga shartnoma muddatidan oldin bekor qilingani uchun tovon puli sifatida 13–15 million yevro to‘laydi.
“Manchester Siti” mavsum yakuniga ko‘ra APLda 38 o‘yin o‘tkazib, 91 ochko jamg‘argan. Pep Gvardiola jamoasi ketma-ket to‘rtinchi marta Angliya Premyer Ligasi chempionligini qo‘lga kiritib, mamlakat tarixida rekord o‘rnatdi. “Arsenal” Angliya Premyer Ligasi turnir jadvalida 89 ochko bilan “Manchester Siti”dan ikki ochko ortda qolib, ikkinchi o‘rinni egalladi. “Liverpul” 2023—2024-yilgi mavsumni APL turnir jadvalida uchinchi o‘rinda yakunladi. Jamoa 38 uchrashuvda 82 ochko jamg‘argan.
Izoh (0)