Saudiya Arabistoni kompaniyasi O‘zbekistonda xalqaro maktab tashkil etish imkoniyatlari bilan tanishmoqda, deb xabar berdi Dunyo” AA.
Ma’lum qilinishicha, O‘zbekiston elchisi Nodirjon Turg‘unov Saudiya Arabistonidagi Al Faris International kompaniyasi raisi Osama ibn Solih bilan uchrashib, O‘zbekistonda taʼlim sohasida yangi innovatsion o‘quv dasturlarini tatbiq etish, xususiy xalqaro maktablar filiallarini ochish va o‘qituvchilar malakasini oshirish masalalarini muhokama qildi.
Osama ibn Solih o‘zi boshqarayotgan Al Faris International kompaniyasi taʼlim sohasini rivojlantirish, o‘qitish sifatini yaxshilash, o‘quvchilar bilimini oshirish yo‘nalishida ish olib borishini bildirdi. Kompaniya sarmoyasi bilan tashkil etilgan xalqaro maktablar dunyo mamlakatlari xalqaro standarti IBO'ga asosan faoliyat olib bormoqda. Ular Saudiyadagi maktablar orasida eng yuqori o‘rinlarda turadi.
Elchi Nodirjon Turg‘unov shu kabi maktablarni O‘zbekistonda ochish, o‘quvchilar bilimini har tomonlama yaxshilash va o‘qituvchilarning malakaviy ko‘nikmasini oshirish bo‘yicha hamkorlik o‘rnatish taklifini bildirdi. Saudiya tomoni ushbu taklifni to‘liq qo‘llab-quvvatlashini maʼlum qilib, bu borada barcha imkoniyatlar mavjudligini bildirdi.
Biz yuz foiz o‘z kapitalimiz asosida yoki o‘zbekistonlik sheriklar bilan xalqaro maktablarni tashkil etishga tayyormiz. Ushbu maktablarda xalqaro standartlarga mos ravishda taʼlim beriladi, o‘qish xorijiy va mahalliy til qatʼiy talabi asosida olib boriladi, — dedi u.
Bundan tashqari, maktabgacha taʼlim muassasalari ham tashkil etilishini, unda 6 yoshgacha bo‘lgan bolalarga maktabga tayyorgarlik bo‘yicha kuchaytirilgan darslar o‘tilishini qo‘shimcha qildi.
Izoh (0)