Rossiya prezidenti Vladimir Putin Davlat dumasiga bosh vazir lavozimiga Mixail Mishustin nomzodini taqdim etdi. Bu haqda duma spikeri Vyacheslav Volodin xabar berdi.
Bugun (10-may kuni) Davlat dumasi bosh vazir nomzodini muhokama qiladi. Soat 14:00 da (Toshkent vaqti bilan 16:00) Davlat dumasining yalpi majlisi boshlanadi. Unda hukumat raisi nomzodini tasdiqlash masalasi bo‘yicha ovoz berish bo‘lib o‘tadi. Bungacha Mishustin deputatlarning savollariga javob beradi.
Nomzodlik muhokamasi chog‘ida Putin tomonidan demografik siyosatda, odamlarning farovonligini oshirish, bolali oilalarni qo‘llab-quvvatlash, yoshlar siyosatini amalga oshirish, texnologik suverenitetni mustahkamlash, iqtisodiy va mintaqaviy rivojlanish; mamlakat mudofaa qobiliyatini oshirish bo‘yicha belgilangan vazifalar qanday hal etilishi haqidagi savollarga javob olish muhimdir, — dedi Volodin.
7-may kuni Putin inauguratsiyasi bo‘lib o‘tdi. Bu uning beshinchi prezidentlik muddati. Qonunga muvofiq, inauguratsiya kuni Mixail Mishustin boshchiligidagi hukumat iste’foga chiqdi. Inauguratsiya qilingan paytdan boshlab ikki haftadan kechiktirmay prezident Duma ma’qullashi uchun bosh vazir nomzodini taqdim etishi kerak. Bir haftadan kechiktirmay bosh vazir prezidentga hukumatning yangi tarkibini taklif qilishi lozim.
Mishustin Vladimir Putin taklifi bilan 2020-yil yanvarida avvalgi bosh vazir Dmitriy Medvedevning iste’foga chiqishi sababli bosh vazir etib tayinlangandi.
Izoh (0)