“Titanik” filmi hamda “Uzuklar hukmdori” trilogiyasi yulduzi, britaniyalik aktyor Bernard Hill bir kam 80 yoshida vafot etdi. Bu haqda aktyorning agentiga tayanib “Pravila jizni” nashri xabar bermoqda.
Agentning ma’lum qilishicha, aktyor 5-may kuni erta tongda vafot etgan. O‘sha kuni kechqurun BBC One telekanalida uning ishtirokidagi “The Responder” filmining ikkinchi fasli premyerasi bo‘lib o‘tdi.
BBC Drama direktori Lindsi Solt marhum aktyor haqida shunday dedi:
Bernard Hill kino sanoatida o‘chmas iz qoldirdi. Uning ajoyib va ramziy rollarga boy uzoq yillik faoliyati aktyorning professional iste’dodidan dalolat beradi.
Bernard Hill 1944-yilda Manchester shahrida konchilar oilasida tug‘ilgan. U 1970-yillarda kino va televideniyeda faoliyat boshlagan. 1982-yilda narkotik moddalar iste’moli va kriminal hayotga o‘ralashib qolgan 3 yigit haqida hikoya qiladigan “The black stuff” teleserialidagi rolidan keyin Buyuk Britaniyada mashhurlikka erishdi.
Hill “Titanik” filmidagi kapitan Edvard Jon Smit va “Uzuklar hukmdori” trilogiyasidagi qirol Teoden rollari bilan mashhur. Aktyor rafiqasi, amerikalik aktrisa Marianna Hill va o‘g‘li Gabriel bilan Saffolkda istiqomat qilgan.
Izoh (0)