Uch yildan buyon 15-aprel Madaniyat va sanʼat xodimlari kuni sifatida nishonlanadi. Madaniyat vaziri Ozodbek Nazarbekov bayram munosabati bilan bir guruh soha vakillarini taqdirladi.
— Barcha sohalar qatori madaniyat sohasida ham raqobat tobora kuchayib bormoqda. Inson ongi, hissiyotlari uchun kurash ketmoqda. Qadriyatlarga taʼsir o‘tkazishga, uni o‘zgartirishga urinishlar bo‘lmoqda. Shunday murakkab bir davrda aynan madaniyat va sanʼat sohasi qalb himoyachisi, tafakkur himoyachisi, qadriyatlar himoyachisi bo‘lib katta maydonda o‘zini ko‘rsata olishi kerak. Boshqacha aytganda, xalqning uyg‘oqligi bevosita madaniyatga, maʼnaviyatga bog‘liq. Shu maʼnoda, jamiyatimizda maʼnaviy muhit barqarorligini taʼminlash, millatlararo do‘stlik va hamjihatlikni mustahkamlash, yoshlarimizni vatanparvar va fidoyi qilib tarbiyalash masalalari barchamiz uchun dolzarb vazifadir. Bu borada Hurmatli Prezidentimiz Respublika Maʼnaviyat va maʼrifat kengashining kengaytirilgan yig‘ilishida ko‘plab reja va maqsadlarni belgilab berdilar — dedi madaniyat vaziri Ozodbek Nazarbekov o‘z nutqida.
Madaniyat vazirligi tomonidan jabhada fidokorona mehnat qilayotganlarni rag‘batlantirish maqsadida “Madaniyat va sanʼat fidokori” ko‘krak nishoni ham taʼsis etilgan bo‘lib, 2023-yil davomida (yil davomidagi bayramlar arafasida) 250 nafarga yaqin soha fidoyilari ushbu ko‘krak nishoni bilan taqdirlangan.
Bu yil uchinchi bor nishonlanayotgan mazkur sana munosabati bilan 50 nafarga yaqin madaniyat va sanʼat fidoyilari “Madaniyat va sanʼat fidokori” ko‘krak nishoni bilan taqdirlandi hamda bu jarayon yil davomida bayramlar arafasida davom etadi.
Bayram tadbiri davomida bayramona konsert dasturi ham tashkil etildi.
Izoh (0)