Qirg‘iziston yaqin 11 yil ichida tashqi qarzini to‘liq to‘lash niyatida. Bu haqda respublika prezidenti Sadir Japarov “Kabar” davlat axborot agentligiga bergan intervyusida ma’lum qildi.
“2035-yilgacha to‘planib qolgan 5 milliard dollarlik tashqi qarzimizni to‘laymiz. To’lov muddati jamoamning ish davriga to‘g‘ri keldi. Xudoga shukur, bizda bunga kuch bor. Iqtisodiyotimiz yaxshilandi. Mamlakatda tinchlik va barqarorlik bor ekan, biz bemalol qarzimizni uzamiz”, — dedi u.
Sadir Japarovga ko‘ra, davlat olingan har bir dollarni aniq loyihalarga jalb qiladi.
“Ularni o‘z-o‘zini ta’minlaydigan loyihalar uchun sarflaymiz. Bitta misol keltiraman: Qambarota 1 GES qurilishiga 5-6 milliard dollar sarflanadi. Eng muhimi, 2035-yilga borib avval yuzaga kelgan qarzlarni to‘liq to‘laymiz. Kelajakda qancha qarz olmaylik, har bir loyiha o‘zini oqlaydi”, — dedi u.
Qirg‘iziston Moliya vazirligi ma’lumotlariga ko‘ra, respublikaning davlat qarzi qariyb 6 milliard dollarni tashkil etadi, shundan 4,5 milliard dollari tashqi qarz, 1,5 milliard dollari esa ichki qarzdir.
Izoh (0)