Turkmaniston prezidenti Serdar Berdimuhamedov islomda ulug‘langan Qadr kechasi munosabati bilan 356 nafar mahbusni afv etdi. Bu haqda “Turkmenistan: zolotoy vek” nashri xabar berdi.
Afv etish masalasi prezident raisligidagi majlisda muhokama qilingan. Prezident farmonida jinoyat sodir etganligi uchun sudlangan, biroq qilmishidan chin dildan pushaymon bo‘lgan fuqarolar ham borligi qayd etilgan.
Davlat xavfsizlik kengashi kotibi, Prezidenti huzuridagi fuqarolik va afv etish masalalari bo‘yicha komissiya rahbari Begench Gundog‘diyevga tanlangan mahkumlarni ozod qilish va oilalariga qaytarish bo‘yicha ishlarni amalga oshirish topshirildi. Shahar va tuman hokimliklari rahbarlariga afv etilgan Turkmaniston fuqarolarini ishga joylashtirish choralarini ko‘rish bo‘yicha topshiriqlar berildi.
Mazkur mavzu muhokamasini sarhisob qilar ekan, Serdar Berdimuhamedov tez orada qamoqxonani tark etuvchi fuqarolarga vijdonan mehnat qilib, mamlakatda amalga oshirilayotgan keng ko‘lamli o‘zgarishlarda qatnashish hamda Vatanga sidqidildan xizmat qilishni tiladi.
Turkmanistonda mahbuslarni afv etish aksiyalari muntazam o‘tkazib kelinmoqda. So‘nggi bir necha yil ichida respublikaning 20 mingdan ortiq muqaddam sudlangan fuqarolari ozod etilgan.
Izoh (0)