Taniqli aktrisa Muqaddas Sa’dullayeva “Darakchi.uz”ga bergan intervyusida turmush o‘rtog‘ini yo‘ldan urishga intilgan aktrisa haqida so‘zlab berdi.
— Oxirgi payt bir aktrisa juda xunuk ishlar qildi. Biz besh oy mobaynida birga yashamagan paytimizda u aktrisaning turmush o‘rtog‘im bilan qandaydir munosabatda bo‘lganini sezib qoldim. Turmush o‘rtog‘im endi erkak kishi, o‘sha paytda biz birga yashamayotgan edik, ularni tushunsa bo‘ladi. “G‘unajin ko‘zini suzmasa, buqa ipini uzmaydi”, degan gap bor. Har xil syomka jarayonlaridan eshityapman shunaqa gaplarni, menga yetkazishyapti. U ko‘zini suzayotgani aks etgan turli kadrlarni menga tashlashyapti. U aktrisaning o‘ziga aytishga ozgina hayo qildim va o‘sha yerda u bilan ishlayotgan bir san’atkor ayolga tushuntirdim. “Shu qizning ozgina tanobini tortib qo‘ying, o‘ylamasin, biz hali yarashamiz, chunki farzandlarimiz bor”, dedim. O‘zim ham aktrisa bo‘lganman. Kliplar va filmlarda oilali aktyorlar bilan juftlik rolini o‘ynaganimizda doim masofa saqlardim.
— Ogohlantirdim, Instagram sahifasidan ham turmush o‘rtog‘imni chiqarib tashlasin, dedim. O‘sha paytda Instagram’laridan chiqarib, bir zumga yo‘qolib qoldi. Keyinroq yana safarlarda birga bo‘lib qolishganida, yana Instagram’lariga turmush o‘rtog‘imni qo‘shib olibdi, yana nimadir paydo bo‘lgan u qizda. Bir tadbirda turmush o‘rtog‘im ikkimiz u bilan ko‘rishib qoldik. O‘shanda u aktrisa xuddi u emas, xuddi men uning erini tortib olayotgandek boshini baland tutib menga qarab turibdi. O‘ziga ham yozdim, lekin u men bilan birga-bir olishyapti, to‘xtamayapti. Turmush o‘rtog‘imdan uzoq bo‘l, deb chiroyli qilib yozib yubordim. “Seni turmush o‘rtog‘ing sevmasa, itga ham keraging bo‘lmasa, mendami ayb?”, deb javob qaytaribdi. O‘shanda men xalqning ko‘zida farishtani yoqib olgan aktrisaning asl basharasini yana bir bor ko‘rdim.
Muqaddas Sa’dullayeva ushbu vaziyatga turmush o‘rtog‘ining munosabati haqida ham to‘xtalib o‘tdi.
— Turmush o‘rtog‘im bu vaziyatga aralashmang, men siz bilanman. U mening didimdagi qiz emas. Meni didimdagi ayol sizsiz, dedilar. Lekin u men bilan baravar olishayotgani jahlimni chiqardi. Bitta intervyuda “U insonlar mening 30 soniya gapirishimga ham arzimaydi”, debdi. Lekin Instagram sahifalarida men haqimda yozishda davom etyapti. Nima emish, men uni ko‘rolmayotgan ekanman. Nimasini ko‘rolmasligim mumkin? Alhamdullillah, men ham o‘zimga yarasha ijod qilganman. Hozir ijodda bo‘lmasam ham, oilam, uyim-joyim, farzandlarim bor. Shu narsalar meni xafa qildi, o‘ylantirdi. Nahotki hozir yoshlar shunday bo‘lib ketyapti?
Aktrisa “Xiyonatni kechira olasizmi?” degan savolga quyidagicha javob berdi:
— Hamma narsaning chegarasi bor. O‘ta quyushqondan chiqib ketgan xiyonatni kechirib bo‘lmaydi, menimcha. Lekin bir narsani ayta olaman, turmush o‘rtog‘im mening yonimda bo‘lsalar, juda ham sadoqatlilar, bunga ishonaman. Endi erkakchilikda bo‘lib turadi. Buning ustiga 5 oy ayoli yonida bo‘lmasa, bunaqa qizlar ko‘z suzib tursa. Bu qizni qilayotgan davomiy ishi ozgina jahlimni chiqargan.
Izoh (0)