O‘zbekistonda elektr tarmog‘idan o‘g‘rincha foydalanish bo‘yicha yana 3 ta holat fosh etildi

O‘zbekistonda elektr energiyasidan noqonuniy foydalanish bo‘yicha yana 3 ta holat fosh etildi.

Bosh prokuratura huzuridagi departamentning Qo‘shrabot tuman bo‘limi tomonidan o‘tkazilgan tergovga qadar tekshiruvlarda “J.I.” fermer xo‘jaligi va “S.P.” MCHJ mas’ul shaxslari suv nasoslari hamda yangi qurilayotgan binoni isitish pechlari hamda boshqa elektr jihozlarni hech qanday hujjatsiz tijorat maqsadida umumiy foydalanishdagi elektr tarmog‘iga o‘g‘rilik yo‘li bilan ulab, jami 256,8 million so‘mlik elektr energiyasidan noqonuniy foydalangani aniqlangan.

Shu kabi, departamentning Termiz tuman bo‘limi tomonidan “O‘zenergoinspeksiya” xodimlari bilan hamkorlikda o‘tkazilgan tergovga qadar tekshiruvda Denov tumani yo‘llardan foydalanish unitar korxonasi mas’ul shaxslari “Ayritom” MFY hududiga o‘rnatilgan yangi ko‘cha chiroqlarini hech qanday hujjatsiz umumiy foydalanishdagi elektr tarmog‘iga to‘g‘ridan to‘g‘ri ulagani oqibatida jami 169,1 million so‘mlik elektr energiyasidan noqonuniy foydalanilgani aniqlangan.

Departamentning Qo‘qon shahar bo‘limi tomonidan o‘tkazilgan tergovga qadar tekshiruvda esa, fuqaro X.I. va boshqalar “Mingtut” MFYda joylashgan o‘quv markazi binosini hech qanday hujjatsiz tijorat maqsadida umumiy foydalanishdagi elektr tarmog‘iga o‘g‘rilik yo‘li bilan ulab, jami 146,5 million so‘mlik elektr energiyasidan noqonuniy foydalangani aniqlangan.

Mazkur holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari o‘tkazilmoqda.