Prezident tomonidan imzolangan qonun bilan ayrim qonunlarga o‘zgartirishlar kiritildi, deb xabar beradi Telegram’dagi “Huquqiy axborot” kanali.
Qonun bilan “Davlat boji to‘g‘risida”gi hamda “Litsenziyalash, ruxsat berish va xabardor qilish tartib-taomillari to‘g‘risida”gi qonunlarga ko‘chma radiotelefon (radiotelefon, trankli) aloqaga taalluqli litsenziyalanadigan faoliyatning mavjud kichik turlari respublika hududida yo‘ldosh aloqa tarmoqlarini loyihalashtirish, qurish, ulardan foydalanish va ularning xizmatlarini ko‘rsatish kabi faoliyat turi bilan to‘ldirilishini nazarda tutuvchi o‘zgartirishlar kiritildi.
Qonun rasmiy eʼlon qilingan kundan eʼtiboran 3 oy o‘tgach kuchga kiradi.
O‘zbekistonda internet tezligi
2022-yil dekabrda raqamli texnologiyalar vaziri Sherzod Shermatov O‘zbekiston aholisining internet xizmatidan foydalanuvchilari soni 31 milliondan ortganini ma’lum qilgandi. Vazirning qayd etishicha, xalqaro va shaharlararo telekommunikatsiya tarmog‘ini rivojlantirish maqsadida xalqaro internet tarmog‘iga ulanishning umumiy o‘tkazuvchanlik qobiliyati 2,6 barobar oshirilib, 3 200 Gbit/sekundga yetkazilgan.
Respublika 2022-yilda dunyodagi simli internet tezligi bo‘yicha reytingda 155-o‘rinda bo‘lgan. 2023-yilda esa natijalar o‘zgarib, 131-o‘ringa ko‘tarilgan. Yaʼni o‘tgan yilgi reytingga nisbatan 24 pog‘onaga o‘sish bo‘lgan. O‘zbekistondagi simli internet tezligi 21,67 Mbit/s ekani qayd etilgan. Shuningdek, O‘zbekistonda 2023-yil mart oyidan boshlab mobil internet tezligi oshirilishi va mamlakat bo‘ylab 5G texnologiyasi joriy etilishi to‘g‘risida xabar berilgan edi.
Izoh (0)