Farg‘ona shahrida 35 nafar uyushgan jinoiy tuzulmalarga aloqador shaxsning yashash va boshqa manzillarida tezkor qidiruv tadbirlar o‘tkazildi. Bu haqda Farg‘ona viloyati IIB axborot xizmati xabar berdi.
Qayd etilishicha, Farg‘ona shahrida huquqbuzarliklar profilaktikasi, jinoyatchilikni jilovlash, uni oldini olish va barham berish, mahallalarda xavfsiz muhitni yaratish hamda yo‘l-transport hodisalarini oldini olish borasida maxsus profilaktik va tezkor-qidiruv tadbirlari o‘tkazilmoqda.
Viloyat IIB hamda DXX tezkor xodimlari tomonidan o‘tkazilgan ana shunday tadbirlarda, 35 nafar uyushgan jinoiy tuzilmalarga aloqador shaxsning yashash va boshqa manzillarida tezkor qidiruv tadbirlar o‘tkazilgan. Tadbirlar davomida ularning 19 nafaridan 3,81 gramm gashish, 10 dona pichoq, 3 dona xanjar, 2 dona niqob, 1 dona kastet kabi noqonuniy buyum va ashyolar olingan. Natijada 15 ta jinoyat va 24 ta maʼmuriy huquqbuzarliklarga barham berilgan.
Dekabr oyining boshlarida Toshkent shahar IIBB poytaxtda huquq-tartibot idoralari tomonidan “ko‘cha bolalari” va jinoiy guruhlarni aniqlash va qo‘lga olish bo‘yicha keng ko‘lamli reydlar o‘tkazilayotgani haqida xabar bergandi.
2-dekabr kuni Toshkent shahrida “Saidaziz medgorodok” laqabi bilan tanilgan shaxs qo‘lga olingani ma'lum bo‘ldi. U atrofiga jismonan baquvvat shaxslarni to‘plab, qarzdorlik va boshqa muammolarni qonunni chetlab o‘tgan holda hal qilib berish bilan shug‘ullangan. 3-dekabr kuni esa huquq-tartibot idoralari xodimlari “Baxti Tashkentskiy” laqabi bilan tanilgan Baxtiyor Qudratullayevni qo‘lga oldi.
Ko‘p o‘tmay Toshkent shahrida profilaktik tadbir davomida Salimboy nomi bilan tanilgan Salim Abduvaliyev ham ushlandi. 1950-yilda tug‘ilgan Abduvaliyev Salim Kirgizbayevich (248-modda 1-qismi, o‘qotar qurolni qonunga xilof ravishda saqlash) gumon qilinuvchi tarzida jalb etilgan.
Izoh (0)