“Tolibon” hukumati Hayraton—Mozori Sharif—O‘zbekiston temiryo‘li loyihasini tiklash boshlanganini e’lon qildi. Bu haqda Avapress xabar berdi.
“Tolibon” vakillari ishtirokida 6 million 300 ming dollarlik o‘zbek kompaniyasi tomonidan Hayraton—Mozori Sharif temiryo‘lini ta’mirlash ishlari boshlandi. “Tolibon” temiryo‘l qo‘shni davlatlar manfaati yo‘lida ta’mirlanayotganini ma’lum qildi.
“Afsuski, Afg‘oniston rejimi davrida ba’zi kishilarning nodonligi tufayli Hayraton—Mozori Sharif temiryo‘li vayron bo‘lgan va talon-toroj qilingan, shu bois bugun biz ushbu temiryo‘lni hozirgi hukumat mablag‘lari hisobidan ta’mirlash ishlarining ochilishiga guvoh bo‘lamiz”, — deydi Afg‘oniston temiryo‘li rasmiysi Seyid Muhammad Naim Muhammadiy.
U butun Afg‘oniston bo‘ylab xavfsizlikni taʼminlash haqida gapirib, Afg‘onistonni qayta qurish va taraqqiyot yo‘lida ishlash vaqti kelganini aytdi.
“Tolibon” temiryo‘li mutasaddilari o‘zbek shirkati vakillarini xavfsizlik va moliyaviy xavfsizlikni taʼminlashga ishontirib, Hayraton—Mozori Sharif temiryo‘li loyihasida ishlayotgan o‘zbekistonlik ishchilar uchun hech qanday xavf yo‘qligini aytdi.
Hayraton—Mozori Sharif temiryo‘lining faollashishi savdogarlar va yuk tashish jarayoni uchun foydali va samarali ekani aytilmoqda. Uning uzunligi qariyb 75 kilometrni tashkil etadi va loyiha ikki oydan kamroq vaqt ichida yakunlanishi kutilmoqda.
Izoh (0)