Qashqadaryo va Toshkent viloyatlarida kuchli taʼsir qiluvchi dori vositalarini muomalaga kiritilishining oldi olindi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.
Maʼlum qilinishicha, departamentning Olmaliq shahar bo‘limi tomonidan DXX va IIB xodimlari bilan hamkorlikda o‘tkazilgan tezkor tadbirda muqaddam sudlangan U.M. noqonuniy daromad orttirish maqsadida jami 100 dona “Zardeks” nomli kuchli taʼsir qiluvchi dori vositasini o‘tkazish maqsadida yonida saqlab kelayotganligi aniqlanib, ashyoviy dalil sifatida olingan.
Shu kabi, Departamentning Qarshi tuman bo‘limi tomonidan IIB xodimlari bilan hamkorlikda o‘tkazilgan tezkor tadbirda, “M.Ph.” MCHJga qarashli dorixona sotuvchisi A.SH. hech qanday hujjatsiz jami 50 dona kuchli taʼsir qiluvchi dori vositasini xaridorga sotgan vaqtida ushlanib, dorixonadan jami 94 dona kuchli taʼsir qiluvchi dori vositasi ashyoviy dalil sifatida olingan.
Mazkur holatlar yuzasidan Jinoyat kodeksining 251-1-moddasi (kuchli taʼsir qiluvchi yoki zaharli moddalarni qonunga xilof ravishda muomalaga kiritish) bilan jinoyat ishlari qo‘zg‘atilib, tergov harakatlari o‘tkazilmoqda.
Izoh (0)