Xonanda, bastakor, musiqiy prodyuser va Boney M. guruhi asoschisi Frank Farian (haqiqiy ismi Frans Royter) 83 yoshida vafot etdi. Bu haqida “Pravila jizni” xabar bermoqda.
Farian Mayamidagi uyida vafot etgan. Uning yaqinlari o‘lim sababini ochiqlamadi. 2022-yilda xonanda yuragida jarrohlik amaliyotini o‘tkazib, yurak klapanini almashtirgan edi.
Farianning katta mashhurlikka erishishi Boney M. guruhini tashkil qilgani bilan bog‘liq. Bastakor guruh uchun Daddy Cool, Rasputin va Maryʼs Boy Child kabi xitlarni yozgan.
Shuningdek, u Eruption, Precious Wilson, Far Corporation, Milli Vanilli, La Bouche kabi yana bir qancha taniqli loyihalarga ham asos solgan. 1990-yilda prodyuser Milli Vanilli pop-guruhi fonogramma ijro etganini va uning ikki aʼzosi — xonandalar Robert Morvan va Fabris Pilatus guruh qo‘shig‘ini aytmaganini tan oldi. Mojarolar fonida raqqos qo‘shiqchilar ixtiyoriy ravishda “Gremmi” mukofotini marosim tashkilotchilariga qaytarib bergan.
Ma’lumot uchun, Frank Farian 1941-yilda Germaniyada tug‘ilgan. 1961-yilda u o‘zining Frenki Farian und die Schatten guruhini tashkil qiladi, lekin 1968-yildan boshlab yakkaxon qo‘shiqchi sifatida chiqish qila boshlaydi. 1976-yildan esa Farian unga katta mashhurlikni olib kelgan Boney M. guruhiga asos solgan.
Izoh (0)