Eron razvedkasi ISHID guruhining ikki aʼzosi o‘ldirilgani va qator yetakchilari hibsga olingani haqida eʼlon qildi, shuningdek, bir necha yil avval Tehron g‘arbidagi Kobul universitetiga hujum uyushtirgan shaxs topildi.
IRNA axborot agentligining xabar berishicha, Eron Razvedka vazirligining 19-yanvar, juma kuni e’lon qilgan bayonotida Kirmondagi hujumdan bir necha kun o‘tib, yana terakt sodir etish maqsadida Eronga kirib kelgan ikki “xorijiy terrorchi” mamlakat razvedka kuchlari tomonidan o‘zaro otishmalarda halok bo‘lgan. Eron razvedka vazirligi ma’lumotlariga ko‘ra, ularning o‘ldirilishi bilan politsiya markazlaridan biriga hujum ssenariysi zararsizlantirilgan.
Vazirlik ma’lum qilishicha, ISHIDning yana sakkiz nafar a’zosi, shu jumladan ushbu guruh amirlari va yetakchilari aniqlanib, hibsga olingan.
ISHID yetakchilaridan biri Muhammad Imron Tanvir ISHIDning “Viloyati Xuroson” bo‘linmasi qo‘mondonlaridan biri. U bomba yasash bo‘yicha mutaxassis va Kirmondagi hujumni rejalashtirgan “Abdulloh Tojiki”ga aloqador shaxslardan biri ekani aytildi.
Eron Razvedka vazirligi e’lonida Muhammad Imron Tanvir taxminan sakkiz yil avval ISHID safiga qo‘shilgani va mintaqaning bir qancha davlatlarida bo‘lgani aytiladi.
E’longa ko‘ra, ISHIDning hibsga olingan a’zolaridan biri “Mahtob” laqabli shaxs bo‘lib, u ham “Abdulloh Tojiki” bilan bog‘liq va Eronga ishchi niqobi ostida kirib kelgan.
Razvedka vazirligi, shuningdek, ISHIDning “Adel Panjshiri” ismli boshqa yetakchisi aniqlaganini va u Tehron g‘arbidagi hududga kirganini bildirdi. Vazirlik ma’lumotlariga ko‘ra, Adel o‘tmishda Kobul universitetida xudkushlik hujumini rejalashtirganlikda ayblanib hibsga olingan. U bir yil Bag‘rom qamoqxonasida saqlanib, ozod qilingan va yana jinoiy faoliyatga o‘tgan. Shu paytgacha uning atrofidagi bir qancha odamlar aniqlangan va hibsga olingan, biroq Muhammad Adel Aref qidiruvda. Adelga tegishli surat ham e’lon qilingan.
Eslatib o‘tamiz, 2020-yil oktyabr oyida qurolli shaxslar Kobul universitetiga hujum qilgan va bu hujumda aksariyati talabalardan iborat 22 kishi halok bo‘lgan, 40 ga yaqin odam jarohatlangan edi. Ushbu hujum uchun javobgarlikni ISHID guruhi o‘z zimmasiga oldi, biroq avvalgi hukumat rasmiylari bunda “Tolibon”ni aybladi.
Izoh (0)