Samarqandda yuk mashinasi va Isuzu avtobusi ishtirokida yo‘l-transport hodisasi sodir bo‘ldi. Bu haqda Samarqand viloyati IIB JXX YHXB axborot xizmati xabar berdi.
Ma’lum qilinishicha, 16-yanvar kuni soat 13:20 lar atrofida Urgut tumani hududidan o‘tuvchi 4R-47 Bulung‘ur—Urgut avtomobil yo‘lining “Mergancha” mahallasi hududidan o‘tuvchi 64-kilometrida Isuzu avtobusi bilan Changan rusumli yuk mashinasi o‘rtasida to‘qnashuv sodir bo‘lgan. Natijada Isuzu rusumli avtobus yo‘lning o‘ng tomonidagi ariqqa ag‘darilgan.
Hodisa oqibatida avtobus salonida bo‘lgan haydovchining yordamchisi tan jarohati olib tuman tibbiyot birlashmasiga murojaat qilgan va yengil tan jarohati olgani uchun uyiga javob berib yuborilgan. Ayni paytda Urgut tumani IIB JXX YHXB tomonidan dastlabki surishtiruv ishlari olib borilmoqda.
Eslatib o‘tamiz, iyun oyida Toshkent shahar Uchtepa tumanida yo‘lovchi elektrobusi va Lacetti ishtirokida YTH sodir bo‘lgandi. Sentyabrda esa Toshkentda yo‘lovchilar bo‘lgan elektrobus beton ustunga borib urilgan edi.
Izoh (0)