Tojikistonning Konibodom shahridagi Firuzoba mahallasida yashovchi 32 yoshli erkak onasini 136 marta pichoq urib o‘ldirdi. Bu haqda IIV Sug‘d viloyati bo‘yicha matbuot kotibi Akbar Sharifiy xabar berdi.
Sharifiyning ma’lum qilishicha, qo‘lga olingan SH.N va 65 yoshli marhuma o‘rtasida 24-noyabr kuni janjal kelib chiqqan. Ona va o‘g‘il o‘rtasidagi mojaro sabablari ma’lum qilinmayapti, SH.N tergov tadbirlari davomida onasi qanday vafot etgani haqida batafsil gapirib bergan.
“U pichoqni olib, meni urmoqchi bo‘lib oldimga keldi. Lekin men undan pichoqni olib, yuziga bir marta urdim. Keyin qorniga, qo‘llariga, bo‘yniga, boshiga... Yiqilib o‘ldi...”, — deydi u.
Tergovda qayd etilishicha, ayblanuvchi onasiga 136 marta pichoq urib, jinoyat izlarini yashirish maqsadida ayolning qonli kiyimini almashtirib, xonasiga olib borib, yotqizib, poldagi qonni yuvib, qotillik uchun ishlatilgan pichoqni tozalagan.
“Faqat ertasi kuni SH.N qarindoshlariga onasining kutilmaganda vafot etgani haqida xabar bergan, biroq ayolning qarindoshlaridan birining so‘zlariga ko‘ra, marhumaning bo‘ynidagi pichoq jarohatlari izlarini ko‘rib, ular “kutilmagan va to‘satdan o‘lim” haqidagi versiyaga ishonmagan”, deyiladi hisobotda.
Shuningdek, ayol ruhiy kasallikdan aziyat chekkan va 1993-yildan beri mahalliy ruhiy shifoxonada ro‘yxatga olingan. Endilikda tergov psixiatrik ekspertiza orqali SH.Nning ruhiy holatini tekshiradi, biroq u shu paytgacha psixiatrlar ro‘yxatidan o‘tmagan.
Ayblanuvchiga nisbatan Tojikiston jinoyat kodeksining 104-moddasi bilan jinoiy ish ochilgan. O‘ta shafqatsizlik bilan qotillik qilgani uchun uni 25 yilgacha yoki umrbod qamoq jazosi kutmoqda.
Izoh (0)