Bryanskdagi 5-sonli gimnaziyada o‘quvchi qiz otishma sodir etgani haqida xabar berilgandi. Rossiya Tergov qo‘mitasi maʼlumotlariga ko‘ra, 14 yoshli qiz maktabga miltiq olib kelib, sinfdoshlariga qarata o‘t ochgan. Besh kishi jabrlangan, yana bir maktab o‘quvchisi olgan jarohatlari tufayli vafot etgan. Otishma uyushtirgan qiz o‘z joniga qasd qildi. Jabrlanganlar shifoxonalarga yetkazildi.
“RIA Novosti”, “TASS” va boshqa OAV maʼlumotlariga ko‘ra, otishmani 8-sinf o‘quvchisi uyushtirgan. Baza va Mash Telegram kanallari uning ismini Alina deb atashdi. Qiz otasiga tegishli quroldan o‘q uzgan, deb yozadi “RIA Novosti”. Mash nashriga ko‘ra, u ov miltig‘idan foydalangan.
Baza Telegram kanali ma’lumotlariga ko‘ra, Alina biologiya darsi boshlanayotgan to‘rtinchi qavatdagi sinfxonaga ko‘tarilib, sinfdoshlariga qarata o‘q otishni boshlagan. Shot Telegram kanalining xabar berishicha, otishma sodir bo‘lgan maktabda metall buyumlarni aniqlovchi uskunalar yo‘q.
Otishmaning asosiy sababi sifatida sinfdoshlar bilan mojaro ko‘rib chiqilmoqda, deb xabar berdi “TASS” huquq-tartibot idoralaridagi manba. Mash ta’kidlashicha, Alina boshlang‘ich sinf paytidan beri maktabda haqoratlanib kelgan. Telekanal xabariga ko‘ra, u yigitlarga qarata o‘q uzgan. Otishma haqidagi dastlabki xabarlarda “RIA Novosti” to‘rt nafar o‘g‘il bolaning yaralangani haqida xabar berdi.
Otishma oqibatida halok bo‘lgan qiz — 13 yoshli Mariya, deb yozadi Baza. Telegram kanallarida gimnaziyadagi otishma lahzalari aks etgan videolar tarqaldi.
Davlat Dumasi deputati Aleksandr Xinshteyn maktab o‘quvchisi o‘q uzgani aytilayotgan qurol suratini e’lon qildi. Uning so‘zlariga ko‘ra, otishma “Bekas-3” ov miltig‘idan amalga oshirilgan. Deputatning fikricha, sodir bo‘lgan voqealarga “o‘qotar qurol saqlashga beparvo munosabat” sabab bo‘lgan.
Hozircha Tergov qo‘mitasi hodisa yuzasidan qotillik moddasi bo‘yicha jinoiy ish qo‘zg‘atdi.
Otishma sodir etgan maktab o‘quvchisining otasi so‘roq uchun olib ketildi, deb yozadi “TASS”. Mash ma’lumotlariga ko‘ra, Alinaning egizagi bor — 14 yoshli Dasha. U otishma paytida sinfxonada bo‘lgan, unga zarar yetmagan.
Izoh (0)