Toshkent viloyatining Bo‘ka tumanidagi ichki ishlar binosida o‘g‘rilikda gumonlanib, kaltaklangan, qiynoqqa solingan 36 yoshli Usmon Salimboyev ko‘p o‘tmay vafot etgani xabar berilgandi. Ichki ishlar vazirligining o‘sha paytda bergan bayonotiga ko‘ra, o‘g‘rilikda gumonlangan fuqaro noqonuniy tarzda, tergov xonasida emas, xizmat xonasida so‘roq qilingan. So‘roq davomida kaltaklangan, qiynoqqa solingan fuqaro o‘sha kuni tunda vafot etgan. Toshkent viloyati sudi axborot xizmati mas’uli Sherzod Xudoyberdiyevning “Daryo”ga ma’lumot berishicha, marhum o‘limida gumondorlarga sud hukmi o‘qilgan.
.jpg)
2023-yilning 1-dekabr kuni aybdorlarga hukm o‘qigan Jinoyat ishlari bo‘yicha O‘rta Chirchiq tuman sudi tergovida aniqlanishicha, 2023-yilning 3-iyun kuni soat taxminan 22:00 larda gumonlanuvchi Usmon Salimboyev Bo‘ka tuman IIB Jinoyat qidiruv bo‘limining tezkor xodimlari tomonidan protsessual tartib buzilgan holda maxsus so‘rov xonasiga emas, balki xizmat xonasiga olib chiqilib, boshqa jinoyatga aloqadorligi bo‘yicha surishtiruv o‘tkazilgan. Jarayonda fuqaroning sog‘lig‘i yomonlashib, keyinchalik o‘lim holati yuz bergan.
Tayinlangan birlamchi sud-tibbiy ekspertizasining tashxisiga ko‘ra, marhumning tanasida tan jarohatlari borligi aniqlangan. Holat yuzasidan Toshkent viloyati prokuraturasi tomonidan Jinoyat kodeksining 235-moddasi 3-qismi (qiynoqqa solish va boshqa shafqatsiz, g‘ayriinsoniy yoki qadr-qimmatni kamsituvchi muomala hamda jazo turlarini qo‘llash) bilan jinoyat ishi qo‘zg‘atilib, voqeaga aloqador bo‘lgan ikki nafar tezkor xodimlar — J.D. va G‘.Sh.lar hibsga olingan.
.jpg)
Hukmda aytilishicha, fuqaroning o‘limiga to‘rt nafar xodim aybdor deb topilgan bo‘lib, ularning biri Bo‘ka tumani IIB Jinoyat qidiruv bo‘limi boshlig‘i bo‘lgan 37 yoshli J.S., qolgan ikki nafari bo‘limning tezkor vakillari — 38 yoshli D.J. hamda 31 yoshli Sh.G‘. bo‘lgan. Shuningdek, mazkur jinoyat ishida Bo‘ka tumani IIB profilaktika inspektori 31 yoshli S.T. to‘rtinchi vakil bo‘lgan.
Sud xulosasiga ko‘ra, Bo‘ka tumani IIB JQB boshlig‘i bo‘lgan 37 yoshli J.S. Jinoyat kodeksining 207-moddasi 3-qismi “a” (mansabga sovuqqonlik bilan qarash) bandi, 234-moddasi 1-qismi (qonunga xilof ravishda ushlab turish yoki hibsga olish), 235-moddasi 2-qismi (qiynoqqa solish va boshqa shafqatsiz, g‘ayriinsoniy yoki qadr-qimmatni kamsituvchi muomala hamda jazo turlarini qo‘llash) “a”, “v” bandlarida nazarda tutilgan jinoyatlarni sodir etganlikda aybdor deb topilgan. Va unga nisbatan 7 yil muddatga ozodlikdan mahrum qilish jazosi tayinlangan.
38 yoshli tezkor vakil D.J. va 31 yoshli Sh.G‘. Jinoyat kodeksining 234-moddasi 1-qismi va 235-moddasi 3-qismida nazarda tutilgan jinoyatlarni sodir etganlikda aybdor deb topilib, har biri 8 yil-u 6 oy muddatga ozodlikdan mahrum qilingan. Bo‘ka tumani IIB profilaktika inspektori S.T. esa Jinoyat kodeksining 235-moddasi 2-qismi “a”, “v” bandlarida nazarda tutilgan jinoyatni sodir etganlikda aybdor deb topilib, 6 yil muddatga ozodlikdan mahrum etilgan. Ularning barchasi 3 yil muddatga ichki ishlar organlari tizimida ishlash huquqidan mahrum qilingan.
Izoh (0)