Shavkat Mirziyoyev Dubay shahriga tashrifning ishbilarmonlik tadbirlari doirasida 2-dekabr kuni Birlashgan Arab Amirliklari investitsiya vaziri, ADQ xoldingi bosh ijrochi direktori Muhammad Hasan al-Suvaydiy boshchiligidagi delegatsiyani qabul qildi. Bu haqda Prezident matbuot xizmati xabar berdi.
Ma’lum qilinishicha, uchrashuvda TAQA kompaniyasi rahbari Jasim Husayn Tabet va Masdar kompaniyasi rahbari Muhammad Jamil al-Ramahiy ham qatnashgan.
Unda Savdo-iqtisodiy va investitsiyaviy hamkorlikdagi qo‘shma loyihalarni qo‘llab-quvvatlash va ilgari surish masalalari ko‘rib chiqilgan. Iqtisodiyotning ustuvor tarmoqlarida sheriklik jadal rivojlanib borayotgani mamnuniyat bilan qayd etilgan.
“Energetika sektoridagi hamkorlik tobora kengayib bormoqda. Tashrif doirasida bu yo‘nalishda Masdar kompaniyasi bilan Strategik sheriklik to‘g‘risida bitim imzolandi”, — deyiladi xabarda.
Uchrashuv yakunida Shavkat Mirziyoyev Masdar bosh ijrochi direktori Muhammad Jamil al-Ramahiyga ko‘p qirrali O‘zbekiston—BAA munosabatlari rivojiga qo‘shgan shaxsiy hissasi uchun O‘zbekistonning yuksak davlat mukofoti — “Do‘stlik” ordenini topshirdi.
Izoh (0)