Burkina-Fasoning Jibo shahrida “Jamoat Nusrat al-Islom val-Muslimin” guruhi jangarilari 40 nafar tinch aholini o‘ldirdi, yana 42 nafarini yaraladi. Bu haqda “TASS” xabar bermoqda.
BMT Inson huquqlari bo‘yicha Oliy komissari boshqarmasi vakili Seyf Magango harbiy harakatlarda ishtirok etmayotgan tinch aholiga qasddan hujum qilish urush jinoyati ekanini ta’kidladi.
“Burkina-Faso shimolida JNIM qurolli unsurlari tomonidan o‘nlab tinch aholining o‘ldirilishi bizni shokka soldi. Tinch aholiga qarshi hujumlarni oqlab bo‘lmaydi va ular to‘xtatilishi kerak, hujumga javobgarlar har tomonlama, xolis va mustaqil tekshiruvdan so‘ng javobgarlikka tortilishi kerak”, — dedi u.
Magangoning qo‘shimcha qilishicha, jangarilar harbiy baza, uylar, do‘konlar va ichki ko‘chirilganlar lagerlariga hujum qilgan.
Eslatib o‘tamiz, Burkina-Faso 2015-yildan buyon G‘arbiy Afrikadagi terrorchilik harakatining markazi bo‘lib kelgan. Mamlakatda bir qancha xalqaro ekstremistik guruhlar faoliyat yuritadi.
Nohukumat tashkilotlarga ko‘ra, kamida 10 ming tinch aholi va harbiy xizmatchilar jangarilar tomonidan o‘ldirilgan.
Izoh (0)