O‘zbekiston aholisi o‘rtacha necha yil yashayotgani maʼlum qilindi

Mamlakatda o‘rtacha umr ko‘rish davomiyligi 74,3 yoshni tashkil etdi. Bu haqda Statistika agentligi maʼlumot berdi.

2023-yil 1-oktyabrda O‘zbekistondagi doimiy aholi soni 36,6 million kishiga yetdi. Shundan 18 million 423 ming nafari erkaklar, 18 million 177 ming nafari ayollardir.

Joriy yil boshida respublika aholisining tug‘ilishda kutilayotgan o‘rtacha umr ko‘rish davomiyligi 74,3 yoshni tashkil etgan. Ushbu ko‘rsatkich erkaklar uchun 72,1 yosh, ayollar uchun 76,6 yoshga to‘g‘ri kelgan. Shu bilan birga, o‘rtacha umr ko‘rish davri shahar joylarda 74,8 yosh, qishloq joylarda 73,6 yoshni tashkil etmoqda.

“2023-yil 1-yanvar holatiga ko‘ra, O‘zbekistonda 65 va undan yuqori yoshdagi aholi salmog‘i 5,4 foiz. Bu ko‘rsatkich xalqaro mezonlar bo‘yicha O‘zbekiston aholisi “demografik keksayish bo‘sag‘asida”gi mamlakatlar qatoriga kirishini anglatadi”, — deyiladi agentlik axborotida.

Keksayish koeffitsiyenti – BMT demograflari tomonidan keksayish jarayonini baholash maqsadida ishlab chiqilgan uch bosqichli mezon. Unga ko‘ra, 65 va undan yuqori yoshdagi aholi ulushi 4 foizdan kam bo‘lsa – demografik yosh, 4–7 foiz bo‘lsa – keksayish bo‘sag‘asida, 7 foizdan oshsa, hudud aholisi demografik keksa hisoblanadi.

Joriy yil 1-oktyabr holatiga ko‘ra, respublika doimiy aholisi sonining 32 foizi mehnatga layoqatli yoshdan kichiklar, 56,5 foizi mehnatga layoqatli yoshdagilar va 11,5 foizi mehnatga layoqatli yoshdan kattalar hissasiga to‘g‘ri kelmoqda.

Mehnatga layoqatli yoshdagi aholi soni Mehnat kodeksiga muvofiq 16 yoshdan 60 yoshgacha bo‘lgan erkaklar va 16 yoshdan 55 yoshgacha bo‘lgan ayollardan tashkil topadi. 16 yoshgacha bo‘lgan bolalar va o‘smirlar mehnatga layoqatli yoshdan kichiklar, 60 yosh va undan katta erkaklar hamda 55 yosh va undan katta ayollar mehnatga layoqatli yoshdan kattalar toifalariga ajratiladi.

Maʼlumot uchun, O‘zbekistonda yanvar–sentyabr oylarida 716 ming 885 nafar bola tug‘ilgan. Ushbu davrda respublikada vafot etganlar soni 129 ming 664 kishini tashkil etgan. To‘qqiz oy ichida aholi soni 587 ming 221 kishiga tabiiy o‘sgan.