Meta rahbari va milliarder Mark Sukerberg zudlik bilan kasalxonaga yotqizildi. U tizza bo‘g‘imidan jarohat olib, operatsiya qilindi.
Sukerbergning so‘zlariga ko‘ra, u MMA bo‘yicha kelasi yil boshida o‘tkazilishi kerak bo‘lgan jangga tayyorgarlik ko‘rayotgan edi. Endilikda jang qoldirildi.
“Sparring paytida tizzamni jarohatlab oldim va uni qayta tiklash uchun operatsiyadan o‘tdim”, — deb yozdi Sukerberg Facebook sahifasida.
U tuzalganidan keyin mashg‘ulotlarni davom ettirishini qo‘shimcha qildi.
39 yoshli Sukerberg MMA bo‘yicha mashg‘ulotlarni koronavirus pandemiyasi davrida boshlagan. 2023-yilning may oyida u Silikon vodiysida jiu-jitsu bo‘yicha turnirda birinchi o‘rinni egalladi.
Avvalroq milliarder sayyoramizning eng boy odami Ilon Maskka qarshi jang qilishi kutilgandi. Keyinroq Sukerberg Maskning kurashga “jiddiy yondoshmayotgani” tufayli u bilan jangdan voz kechdi.
Izoh (0)