65 yoshli xonanda Madonna musiqa tarixida qo‘shiqlari eng ko‘p sotilgan yetakchi sifatida Ginness rekordini o‘rnatdi. U 40 yillik ijodiy faoliyati mobaynida 400 milliondan ortiq albom, singl va qo‘shiq sotgan.
Taʼkidlanishicha, Madonna bu boradagi yetakchilikni 2009-yildan beri egallab keladi. Undan keyingi o‘rinlarda esa xonandalar Rianna, Merayya Keri, Teylor Svift va Beyonsening ismi tilga olinadi.
2022-yilning iyul oyi holatiga ko‘ra, Madonna gastrol safarlarini uyushtiradigan ijrochi sifatida ham eng yuqori daromad ko‘rsatkichini qayd etgan: uning gastrollari 1,3 milliard dollar miqdorida foyda olib kelgan. Ushbu ko‘rsatkich tez orada o‘sishi aniq, boisi Madonna ayni vaqtda “Celebration Tour” musiqiy turi doirasida konsertlar berishda davom etmoqda.
Madonna o‘zining 12-konsert turini 14-oktyabr kuni London shahrida boshlagan edi. “Celebration Tour” 2024-yilning 24-aprel kuni Mexikoda yakunlanishini rejalashtirilgan. Aslida xonandaning gastrol safari iyul oyida boshlanishi kerak bo‘lgan, ammo ijrochi bakterial infeksiya tufayli kasalxonaga tushib qolgandan keyin tashkilotchilar turni ortga surish qaroriga kelishgan.
“Ijobiy quvvatingiz, duolaringiz va dalda beruvchi so‘zlaringiz uchun tashakkur. Men muhabbatingizni his qilyapman. Hayotimdagi barcha neʼmatlar uchun minnatdorman. Eʼtiborimni salomatligimga qaratganman va yanada kuchli bo‘lishga harakat qilyapman”, – degan edi xonanda kasalxonaga tushib qolgandan keyin.
Ayni vaqtda Madonnaga Teylor Sviftning “The Eras Tour” va Beyonsening “Renaissance Tour”i raqobatchilik qilmoqda. Teylor Sviftning “Eras” turidan keyin milliarderga aylangani maʼlum qilingan bo‘lsa-da Ginness rekordlari kitobi ushbu ikki turning rekord darajadagi sotuvini qayd etganicha yo‘q.
Izoh (0)