Transport vazirligida videokonferensaloqa shaklida tashkil etilgan uchrashuvda Xitoy—Qozog‘iston—O‘zbekiston—Turkmaniston—Eron—Turkiya—Yevropa xalqaro transport yo‘lagini tashkil etish to‘g‘risidagi bitim imzolash bilan bog‘liq jarayonlarni jadallashtirishga qaratilgan masalalar muhokama qilindi. Bu haqda vazirlik matbuot xizmati xabar berdi.
Tomonlar Xitoy—Qozog‘iston—O‘zbekiston—Turkmaniston—Eron—Turkiya—Yevropa xalqaro transport koridorini rivojlantirish barcha uchun birdek manfaatli ekanini, ushbu yo‘lak tranzit tashuvlari va mamlakatlar o‘rtasidagi savdo aloqalarini rivojlantirish uchun yangi imkoniyatlar ochishga xizmat qilishini taʼkidlagan.
Ta’kidlanishicha, hamkorlikning umumiy maqsadi mintaqada savdoni rivojlantirish, xalqaro yuk tashuvlar hajmini oshirish, tranzit tashuvlari va undan tushadigan tushumlarni ko‘paytirishdan iborat. Uchrashuvda muhokama qilingan hamkorlik yo‘nalishlari doirasida tomonlar kelgusida amalga oshiriladigan vazifalarni belgilab olgan.
Yangi muqobil transport yo‘laklarini shakllantirish bo‘yicha amalga oshirilayotgan saʼy-harakatlar “O‘zbekiston – 2030” strategiyasida belgilangan O‘zbekistonning jahon transport-logistika tarmoqlariga integratsiyalashuvini chuqurlashtirish va milliy transport tizimining salohiyatini oshirish maqsadlariga erishishga qaratilganligi bilan ahamiyatli.
- 2022-yilning noyabrida Samarqandda bo‘lib o‘tgan Turkiy davlatlar tashkiloti prezidentlarining sammiti doirasida yangi transport tranzit koridorlarini yo‘lga qo‘yish va rivojlantirish bo‘yicha kelishuvga erishilgan edi.
- 2022-yilning dekabrida Turkiya—Eron—Turkmaniston—O‘zbekiston yo‘nalishida O‘zbekiston va Turkiya o‘rtasida yuklar tashishda eng tez va qulay yo‘nalishlardan biri ochilgandi.
Izoh (0)