Xitoy tashqi ishlar vaziri: “Isroilning G‘azo sektoridagi harakatlari o‘zini himoya qilishdan tashqariga chiqib ketdi”

Xitoy tashqi ishlar vaziri Van Yi Isroil mudofaa kuchlarining G‘azo sektoridagi harakatlari “o‘zini himoya qilishdan tashqariga chiqqanini” aytdi.

Vazir Isroil rasmiylari va harbiylarini G‘azo sektorida yashovchi falastinliklarni “jamoaviy jazolash”dan voz kechishga chaqirdi.

 “Xitoy tinch aholiga zarar yetkazuvchi barcha harakatlarga qarshi chiqadi va qoralaydi, chunki ular inson vijdoniga zid keladi va asosiy xalqaro qonunlarni buzadi”, — dedi Van Yi Saudiya Arabistoni tashqi ishlar vaziri Faysal bin Farxon bilan telefon suhbatida.

Xitoy TIV rahbarining so‘zlariga ko‘ra, Isroil harbiy mojaroning yanada avj olishidan tiyilishi va Falastinning HAMAS islomiy harakati vakillari bilan zudlik bilan tinchlik muzokaralarini boshlashi kerak.

Van Yi tushuntirganidek, Xitoy hozirda urushni tugatish uchun barcha tomonlar bilan yaqindan hamkorlik qilmoqda. “Xitoy Falastinga qarshi yarim asrdan ortiq davom etayotgan tarixiy adolatsizlik davom etishi kerak emas, deb hisoblaydi”, — deya qo‘shimcha qildi Xitoy tashqi ishlar vaziri.