Qozog‘iston Rossiya gazini O‘zbekistonga tashishni oktyabr oyining oxirida boshlaydi. Bu haqda respublika energetika vaziri Almasadam Satkaliyev brifingda ma’lum qildi, deb yozmoqda “Vlast.kz”. Ushbu ma’lumot Rossiyaning “TASS” va boshqa axborot agentliklarida ham chop etildi.
Avval Qozog‘iston Rossiyadan O‘zbekistonga gaz tranzitini 1-oktyabrdan boshlashni rejalashtirgandi. Satkaliyev taʼkidlashicha, hozirda gaz quvurida taʼmirlash ishlari davom etmoqda, Qozog‘istonga tranzit bo‘yicha hali zarur ariza kelib tushmagan.
“Hozirda Qozog‘iston Respublikasi hududida qurilish bilan bog‘liq ishlar yakunlanmoqda, gazni hisobga kiritish uchun alohida liniya ajratilmoqda. Jadvalga ko‘ra, oktyabr oyi oxirigacha ishlar yakunlanishi kerak”, — dedi Satkaliyev.
Uning qo‘shimcha qilishicha, tranzit qilinadigan gaz hajmi bo‘yicha hali yakuniy kelishuvga erishilmagan.
“Daryo” Rossiya gazini Qozog‘iston orqali O‘zbekistonga tashish oktyabrda boshlanishi haqidagi ma’lumotga izoh so‘rab, O‘zbekiston Energetika vazirligiga murojaat qildi. Vazirlik matbuot kotibi bu borada hali rasmiy qaror yo‘qligini bildirdi.
“O‘zbekiston tomoni gazni bugun yuborishsa, bugun qabul qilishga tayyor. Ammo bu jiddiy masala. Tranzit masalasi. Faqat bizgagina bog‘liq bo‘lmagan holat”, — dedi Energetika vazirligi matbuot kotibi Hasan Toshxo‘jayev.
Iyun oyida “Gazprom” “QazaqGaz” bilan gazni O‘zbekistonga tashish bo‘yicha shartnoma imzolanganini e’lon qildi. Rossiya kompaniyasi ham, Qozog‘iston Energetika vazirligi ham kelishuv shartlarini oshkor qilmadi.
Izoh (0)