AQSH Kongressi Vakillar palatasi a’zolari respublikachi Kevin Makkartini spikerlik lavozimidan chetlashtirish to‘g‘risidagi rezolyutsiyani qo‘llab-quvvatladi, deb yozmoqda CNN.
Qaror uchun 216 nafar palata aʼzosi ovoz berdi, 210 nafari qarshi chiqdi. Xususan, ovoz berish tashabbuskori Mett Getse boshchiligidagi sakkiz nafar respublikachi Makkartining iste’fosini yoqlab chiqdi.
30-sentyabr kuni Makkarti demokratlar bilan kelishuvga erishib, 45 kunlik federal xarajatlarni moliyalashtirish uchun budjet rezolyutsiyasini qabul qilgandi, bu hukumat faoliyati to‘xtatilishining oldini olishga yordam berdi. Ushbu murosa tufayli Getse o‘z partiyadoshining iste’fosini talab qildi.
CNN ta’kidlaganidek, Qo‘shma Shtatlar tarixda hech qachon Vakillar palatasi spikerni rezolyutsiya asosida ishdan olmagan.
Respublikachilar partiyasining Shimoliy Karolina shtati vakili Patrik Makgenri AQSH Kongressi quyi palatasining muvaqqat spikeri etib tayinlandi.
Shunga o‘xshash holat AQSH Vakillar palatasida faqat bir marta — 1910-yilning martida kuzatilgan, deb yozadi The New York Times. O‘shanda ovoz berish paytida respublikachilar “Jo amaki” sifatida tanilgan spiker Jozef Kannonni lavozimidan chetlatishga harakat qilgan. U o‘z lavozimini saqlab qolishga muvaffaq bo‘lgan, ammo palatadagi mavqeyi zaiflashgan.
Izoh (0)