Qozog‘iston poytaxti Ostonadagi 14-maktab o‘quvchisi tanaffus vaqtida zinadan yiqilib tushdi, deb xabar berdi shahar ta’lim boshqarmasi. Ijtimoiy tarmoqlarda voqea aks etgan video paydo bo‘ldi.
“14-sonli gimnaziya maktabi o‘quvchisi ikkinchi qavatga ko‘tarilish chog‘ida zinadan yiqilib tushdi. Bolaning so‘zlariga ko‘ra, uni sinfdoshi turtib yuborgan. Voqea joyiga zudlik bilan tez yordam mashinasi chaqirilgan. Bola shahar bolalar shifoxonasida. Hushi o‘zida, holati barqaror. Komaga tushgani yo‘q. Maktab zinapoyasida panjaralar bor”, — deyiladi xabarda.
Avvalroq “NemolchiKZ” jamoat fondi bola “reanimatsiyaga tushib, uch kun davomida komada bo‘lganini” ma’lum qilgandi.
Mazkur voqeadan so‘ng ta’lim muassasasi direktori Didar Baytasov ishdan bo‘shatildi. Informatika fani o‘qituvchisi va direktor o‘rinborasiga ham tanbeh berildi.
Qozog‘iston sog‘liqni saqlash vaziri Ajar Giniyat kasalxonaga yotqizilgan bolaga bosh miya jarohati tashxisi qo‘yilganini ma’lum qildi, deb yozadi “Orda.kz”.
“Bugun uning ahvoli barqaror, ixtisoslashtirilgan bo‘limda. Kecha biz shifokorlar maslahatini o‘tkazdik, bolaga shoshilinch jarrohlik choralari talab qilinmayapti. Bola hali kuzatuv ostida bo‘ladi”, — dedi Giniyat hukumatga.
Uning ta’kidlashicha, tez yordam chaqirilganda, shifokorlarga bolada shunchaki ko‘karishlar borligini aytishgan. Shuning uchun tez yordam uzoq vaqtda kelgan.
Bolalar huquqlari bo‘yicha vakil Dinara Zakiyeva jabrlanuvchi bilan suhbatlashdi.
“Uning kayfiyati yaxshi, voqea qanday sodir bo‘lganini aytib berdi. U o‘rtog‘i bilan birga darsga yugurib ketayotgan bo‘lgan, o‘rtog‘i tasodifan uni turtib yuborgan”, — deb yozdi u Facebook’dagi sahifasida.
Tibbiy kengash ma’lumotlariga ko‘ra, jarrohlik amaliyotiga ehtiyoj yo‘q.
O‘quvchining yiqilib tushishi fakti bilan Sararqa tuman politsiyasi Qozog‘iston Respublikasi Jinoyat kodeksining 141-moddasi (Bolalarning hayoti va sog‘lig‘i xavfsizligini ta’minlash bo‘yicha vazifalarni lozim darajada bajarmaslik) bo‘yicha tergovga qadar tekshiruv boshladi.
Hodisadan keyin Qozog‘istondagi barcha maktablarda tekshiruvlar o‘tkaziladi, dedi Zakiyeva.
“Garchi men bu jinoiy beparvolik deb hisoblasam ham, panjara va zinapoyalar orasida to‘siq bo‘lmagan. O‘quv yili boshida maktab qanday qabul qilingani hozir tekshirilmoqda. Shuningdek, barcha maktablarda reydlar o‘tkaziladi”, — dedi Bolalar huquqlari bo‘yicha vakil.
Izoh (0)