Farg‘onada maktab o‘quvchisi ehtiyotsizlik sabab besh yoshli bolakayni pnevmatik qurol bilan otib qo‘ydi. Bu haqda “Bu kun” informatsion dasturi xabar berdi.
Maʼlum qilinishicha, mazkur holat Farg‘ona viloyati Qo‘shtepa tumanidagi “Karnaychi” mahallasida yuz bergan. Aniqlanishicha, Abdulloh ismli 5 yoshli bola voqea sodir bo‘lgan kuni dadasini ovqatlanishga chaqirish uchun uning oldiga boradi. Dadasi uyining yonidagi chorva mollari parvarish qilish xo‘jaligida ishlagan.
Abdullohning onasining so‘zlariga ko‘ra, gumonlanuvchi maktabning 7 yoki 8-sinf o‘quvchisi bo‘lgan.
“Pnevmatik qurolning o‘qi chap o‘pkadan o‘tib, yurakning chap qorinchasiga kirib qolgan. Yurakni to‘liq to‘xtatgan holda, o‘qni olib tashladik. Hozirda bolaning ahvoli yaxshi”, — deydi shifokor.
Qayd etilishicha, operatsiya jarayoni besh soat davom etgan. Hozirda mazkur holat Qo‘shtepa tumani IIB tomonidan tegishli tartibda o‘rganilib, tergovga qadar tekshiruv ishlari davom etmoqda.