Shoumen Davron Kabulov “Daryo”ning YouTube’dagi kanaliga bergan intervyusida “Kosmos” jamoasiga nega mashhur a’zolar taklif etilmagani va uning ishonchini oqlamagan insonlar tezda guruh tarkibidan chiqarilishi haqida aytib o‘tdi.

— Guruhga kelguniga qadar zo‘r bo‘lib yurgan odamga qancha kuch sarflasangiz ham, mehnatingiz ko‘zga tashlanmaydi. Chunki u alohida ijod qilib yurgan paytida ham zo‘r bo‘lib yurgandi. Ma’ruf Nosirov jamoasi qo‘shilmasidan avval Instagram’da olti mingta obunachisi bor edi. Bugungi kunda uni 370 mingdan ortiq obunachi kuzatadi. Durdona Qurbonova “Million”ga qabul qilinganda bor-yo‘g‘i to‘rt mingta obunachisi bor edi. Buni tan oladimi- yo‘qmi bilmayman, ammo ularning mashhurlikka erishishida ozmi-ko‘pmi, jamoaning ham hissasi bor. Lekin ular orasida “Yo‘q, men o‘zim onamning qornidan millionta kuzatuvchi bilan tug‘ilganman”, deb chiqayotganlar ham bor. Menga murabbiy sifatida tirishib-tirmashadigan inson bilan ishlash qiziq. Qorni to‘q inson ovqat uchun astoydil harakat qilmaydi, reytingi bori 100 foiz kuchini jamoaga sarflamaydi, — deydi Davron Kabulov. 

“Kosmos” jamoasining prodyusseri Davron Kabulov qanday fe’l-atvorli insonlar bilan til topisholmasligi haqida aytib o‘tdi.

— A’zolikka qabul qilingan inson ming iqtidorli bo‘lsa-da, uning hayot tarzi va fe’l-atvori ma’qul kelmasa, u bilan kelajakni ko‘rolmayman. Ertalabgacha tentirab, ayb-ishratini qiladigan insonlarni jamoaga qo‘shilishini istamayman. Kayfiyat uchun uyida ozgina spirtli ichimlik ichadigan insonni to‘g‘ri yo‘lga solish mumkin. Ammo bu ko‘chaga kirib ketib bo‘lgan va undan qaytishga xohishi bo‘lmagan insondan voz kechish kerak. Chunki zararli odatlar ham infeksiyaga o‘xshab, atrofdagilarni ham zaharlaydi. U odamni mashhur bo‘lishiga hissa qo‘shib, keyin guruhdan ketsa odamlar sizni ayblab yurgandan ko‘ra, tinchgina boshidanoq uni “chopgan” yaxshi, — deydi Davron Kabulov. 

Davron Kabulov san’atdan tashqari, tadbirkorlik bilan ham shug‘ullanadi. U suhbat davomida nega erkaklar kiyim do‘konini yopgani va yangi ochilgan xususiy mehmonxonasi haqida ham aytib o‘tdi.

— Ishlab chiqarishni to‘xtatganimiz yo‘q, shunchaki hozircha erkaklar kiyim do‘koni ishlamayapti, xolos. Buning asosiy sababi ishni yurita oladigan yaxshi menejerga yolchimadik. O‘zim jismonan hamma ishga ulgurmayman. Bitta menejerning qo‘li “tormoz”, boshqasi esa ishni umuman yuritolmadi. Xullas, o‘zimizni ham, brendni ham qiynagandan ko‘ra, ishni vaqtincha to‘xtatib turishga qaror qildik. Mahsulotlar ishlab chiqarilyapti va asosan onlayn savdo orqali mijozlarga yetkazib berilyapti. Bundan tashqari, jamoamiz uchun katta ofis kerak edi. Ayni kunda konsert tayyorgarliklari do‘kon binosida bo‘lyapti. Uzoq yillar davomida jahon talablariga javob beradigan xususiy mehmonxona qurdim. Daromadimni unga sarflaganim uchun ham u uzoq vaqt davomida qurildi. Hozircha biznesdagi bor e’tiborimni unga qaratyapman, — deydi Davron Kabulov.