21-sentabr kuni kechqurun Yerevanda Armaniston hukumat binosi oldidagi Respublika maydonida bosh vazir Nikol Pashinyanning iste’fosini talab qiluvchi yirik norozilik namoyishi bo‘lib o‘tdi.
Namoyishchilar hukumat binosi oldiga yig‘ilib, bir necha guruhga bo‘lingan holda shahar ko‘chalari bo‘ylab yurishni boshladi va yo‘llarni to‘sib qo‘ydi, politsiya esa ularni hibsga olishga kirishdi. Namoyishchilar “Nikol — xoin!” deb qichqirishdi.
Marshdan keyin faollar hukumat binosiga qaytdi: u yerda politsiya bilan to‘qnashuvlar boshlandi. OAV xabar berishicha, politsiya odamlarni ayovsiz hibsga olgan.
“RIA Novosti” xabariga ko‘ra, hukumat binosi yaqinida 46 kishi qo‘lga olingan.
Yerevanda norozilik namoyishlari 19-sentabrda, Ozarbayjon tan olinmagan Qorabog‘ respublikasida aksilterror operatsiyasini e’lon qilganidan keyin boshlangan. Namoyishchilar Armaniston hukumatidan mojaroga aralashib, u yerda yashovchi etnik armanlarga yordam berishni talab qildi.
Izoh (0)