Braziliya sobiq prezidenti Jair Bolsonaro irqchilik bayonotlari uchun 188 ming dollar jarimaga tortildi. Bu haqda Reuters xabar berdi.

Ma’lum qilinishicha, Bolsonaro prezidentlik davrida bir qator irqchilik mazmunidagi gaplar qilgan. Voqea 2021-yil may oyidagi ommaviy tadbirda yuz bergan. O‘shanda qora tanli tarafdor sobiq prezident bilan suratga tushishni so‘ragan. Bunga javoban Bolsonaro uning sochida suvarakni ko‘rganini aytib, soch turmagini “suvaraklar uyasi”ga o‘xshatgan.

Sudda Bolsonaro himoyachilari uning gaplari hazil bo‘lgani, qasddan irqiy haqorat qilmaganini aytgan. Shunga qaramay, sud uni jarimaga tortish to‘g‘risida qaror chiqargan. Qaror siyosatchining kasalxonaga yotqizilishi bilan bir paytda e’lon qilindi.

Hozirda Bolsonaro qon bosimining pasayishi va qayt qilish kabi shikoyatlar bilan shifoxonada davolanmoqda. Avvalgi safar Bolsonaru kasalxonaga 14-sentyabr kuni kelgan, o‘shanda uning terisidagi o‘simta olib tashlangan edi. O‘sha paytda shifokorlar unda “temir tanqisligi anemiyasi va yaqinda o‘tkazilgan pnevmoniya izlari” borligini aniqlagan.

Bolsonaro 2019–2023-yillarda Braziliya prezidenti lavozimida ishlagan. 2025-yil 4-avgustdan siyosatchi uy qamog‘iga olingan. 12-sentyabr kuni esa sud uni davlat to‘ntarishini uyushtirishda aybdor deb topib, 27 yil muddatga ozodlikdan mahrum qilgan.