Osiyo taraqqiyot banki (OTB) O‘zbekistonda inson kapitalini rivojlantirishga 93 million dollar ajratadi. Bu haqda Kambag‘allikni qisqartirish va bandlik vazirligi xabar berdi.
Ma’lum qilinishicha, vazirlik rahbari Behzod Musayev OTBning Inson resurslarini rivojlantirish sektori rahbari Ayako Inagaki boshchiligidagi delegatsiya aʼzolari bilan uchrashib, O‘zbekistonda inson kapitalini rivojlantirish sohasida ikki tomonlama hamkorlikni mustahkamlash, kelgusida yangi tashabbuslarni amalga oshirish borasida muzokaralar olib bordi.
“Zamonaviy iqtisodiyot uchun ko‘nikmalarni rivojlantirish” loyihasi bo‘yicha O‘zbekiston va OTB o‘rtasida tuzilgan 93 million AQSH dollari miqdoridagi bitim ijrosini amalga oshirish borasida fikr-mulohazalar bildirildi.
Ushbu loyiha O‘zbekiston sanoat tarmoqlarining raqobatbardoshligini oshirish, yoshlar va ish bilan band bo‘lmagan aholini kasb-hunarga o‘qitish orqali inklyuziv o‘sishni rag‘batlantirishga qaratilgan.
Loyiha qurilish, to‘qimachilik va tikuvchilik sanoati, axborot-kommunikatsiya texnologiyalari, agrobiznes va oziq-ovqat sanoati, texnika va uskunalarga xizmat ko‘rsatish kabi tarmoqlarda malakali ishchi kuchi sifatida inson resurslarini rivojlantiradi.
Izoh (0)