Yaponiyadagi 14 ta Toyota zavodidan 12 tasi tizimdagi nosozlik tufayli ishlashdan to‘xtatildi, deb xabar berdi NHK.
Nashr faqat ikkita zavod — Fukuoka va Kioto prefekturalaridagi muassasalar ishlayotganini yozdi. Nosozlik sabablari, shuningdek, avtomobil kompaniyalarining ishini tiklash vaqti haqida xabar berilmagan. Kompaniya holat sababi sifatida kiberhujumni rad etdi.
Keyinroq Yaponiya iqtisodiyot, savdo va sanoat vaziri Yasutosi Nishimura Toyota’ning barcha 14 ta zavodi ishni to‘xtatganini ma’lum qildi.
Nikkei ma’lumotlariga ko‘ra, nosozlik tufayli Yaponiyaning eng yirik avtomobil ishlab chiqaruvchi kompaniyasi ehtiyot qismlarga buyurtmalarni ko‘rib chiqa olmayapti.
“Biz sababni aniqlash va tizimni tiklash ustida ishlayapmiz”, — deyiladi kompaniya bayonotida.
O‘tgan yilning mart oyida Toyota biznes hamkorlariga kiberhujum tufayli Yaponiyaning barcha zavodlari ishini vaqtincha to‘xtatishga majbur bo‘lgandi, deb eslatdi NHK.
Izoh (0)