Sirdaryoda DXM sho‘ba boshlig‘i qo‘lga olindi

Sirdaryo tuman adliya bo‘limi markaz sho‘ba boshlig‘i qo‘lga olindi, deb xabar beradi Bosh prokuratura huzuridagi departament.

Ma’lum qilinishicha, departament hamda DXXning Sirdaryo viloyati boshqarmalari tomonidan IIB xodimlari bilan hamkorlikda tezkor tadbir o‘tkazilgan. Tadbirda Sirdaryo tuman adliya bo‘limi Davlat xizmatlari markazi sho‘ba boshlig‘i M.B. fuqaro Sh.U.ning ishonchiga kirib, unga 1,4 million so‘m evaziga yashash xonadoni kadastr hujjatlarini rasmiylashtirib berishini aytib, oldindan 1,2 million so‘mni tanishi N.S.ning plastik kartasiga o‘tkazib olgan vaqtida ashyoviy dalillar bilan ushlangan.

Mazkur holat yuzasidan Jinoyat kodeksining 168-moddasi (firibgarlik) bilan jinoyat ishi qo‘zg‘atilib, tergov harakatlari o‘tkazilmoqda.

Bundan oldin Qashqadaryo viloyat qurilish va uy-joy kommunal xo‘jaligi boshqarmasi sho‘ba boshlig‘i pora bilan qo‘lga tushgandi. U tanishlari yordamida ko‘p qavatli uy-joy binosi loyihasini tasdiqlatib berishi evaziga 500 dollar olgan. Shuningdek, Namangan shahar soliq inspeksiyasi boshlig‘i o‘rinbosari va MCHJ yuristi ushlangani to‘g‘risida xabar berilgandi.